Praja Darbar Renamed As Praja Vani :రాష్ట్రంలో కాంగ్రెస్‌ ప్రభుత్వం ఏర్పడగానే, ప్రజా పాలన అందించే లక్ష్యంతో చేపట్టినప్రజా దర్బార్ను ఇకపై ప్రజావాణిగా పిలవాలని ముఖ్యమంత్రి రేవంత్ ఆదేశించారు. ఈ ప్రజావాణిని ఇకనుంచి వారంలో రెండు రోజులు నిర్వహిస్తామని తెలిపారు. ప్రతి మంగళ, శుక్రవారాల్లో నిర్వహించాలని అధికారులకు సూచించారు.
ఈ మేరకు జ్యోతిరావు పూలే ప్రజా భవన్‌లో ప్రజా వాణికి వేళలను కూడా నిర్దేశించారు. ఉదయం 10 గంటల నుంచి మధ్యాహ్నం ఒంటి గంట వరకు నిర్వహించనున్నారు. ఉదయం 10 గంటలలోపు ప్రజావాణి వద్దకు చేరుకున్నవారికి అవకాశం ఇవ్వనున్నారు. వికలాంగులు, మహిళలకు ప్రత్యేక క్యూ ఏర్పాటు, ప్రజల సౌకర్యార్థం తాగు నీరు, ఇతర సౌకర్యాలను కల్పించాలని అధికారులను సీఎం రేవంత్ ఆదేశించారు.
CM Revanth Reddy Key Decision On Praja Vani: ఈ కార్యక్రమంలో జిల్లాల వారీగా కలెక్టర్లు, ఎమ్మెల్యేలు ప్రజల నుంచి అర్జీలు స్వీకరిస్తారు. అనంతరం వారు రాష్ట్ర స్థాయిలో పరిష్కరించాల్సిన సమస్యలు రాష్ట్ర స్థాయి అధికారులకు పంపుతారు. రాష్ట్రవ్యాప్తంగా ప్రజాసమస్యల పరిష్కారం కోసం డిసెంబర్ 8వ తేదీన ప్రారంభమైన ప్రజావాణి కార్యక్రమంలో ఇప్పటి వరకూ దాదాపు 5000 వినతులను ప్రజల నుంచి స్వీకరించినట్లు అధికారులు వెల్లడించారు. ఇందులోనూ ఎక్కువ శాతం డబుల్ బెడ్ రూమ్ ఇళ్లు, వాటి నిర్మాణం, పెన్షన్లకు సంబంధించినవే ఎక్కువగా ఉన్నాయని పేర్కొన్నారు.
Praja Vani in Telangana Timings :గత ప్రభుత్వ హయాంలో ఈ కార్యక్రమం మొక్కుబడిగా సాగిందన్న ఆరోపణలు ఉన్నాయి. ఈ ప్రభుత్వం దీనిపై ప్రత్యేక శ్రద్ధ వహించాలని ప్రజలు కోరుతున్నారు. అన్ని శాఖల జిల్లా స్థాయి అధికారులు వస్తేనే తమ సమస్యలకు పరిష్కారాలు స్పష్టం అవుతాయని ప్రజలు చెబుతున్నారు. దిగువస్థాయి అధికారులతో ఆశించిన ప్రయోజనం దక్కదని అంటున్నారు. అధికారుల దృష్టికి వచ్చిన సమస్యలు, వాటికి లభించిన పరిష్కాలపై తరచూ సమీక్ష నిర్వహించాలని కూడా ప్రజలు కోరుతున్నారు.