కాస్త ప్రశాంతం... కాస్త గందరగోళం

రాష్ట్ర వ్యాప్తంగా తుది విడత స్థానిక సంస్థల పోలింగ్​ ముగిసింది. అక్కడక్కడ చెదురుమదురు ఘటనలు మినహా ప్రాదేశిక ఎన్నికలు ప్రశాంతంగా జరిగాయి. మెుదటి రెండు విడతల్లో జరిగిన పొరపాట్లు జరగకుండా ఎన్నికల అధికారులు తగు జాగ్రత్తలు తీసుకున్నారు. బ్యాలెట్లు తారుమారు లోపం మాత్రం మరోసారి స్పష్టంగా కనిపించింది.

రాష్ట్రంలో 27 జిల్లాల్లో మూడోవిడత ప్రాదేశిక ఎన్నికలు ప్రశాంతంగా ముగిసినా అక్కడక్కడ గొడవలు జరిగాయి. సూర్యాపేట, నల్గొండ, వికారాబాద్​, జగిత్యాల, ఆదిలాబాద్​, మంచిర్యాల, రంగారెడ్డి జిల్లాల్లో అక్కడక్కడ చెదురుమదురు ఘటనలు చోటు చేసుకున్నాయి. కొన్ని చోట్ల గ్రామస్థులు ఎన్నికలను బహిష్కరించారు.

కర్రలతో దాడి చేసుకున్న గులాబీ, హస్తం నేతలు...

సూర్యాపేట జిల్లా అనంతగిరి మండలం అమీనాబాద్​లో తెరాస-కాంగ్రెస్ మధ్య ఘర్షణ జరిగింది. తమ పార్టీకే ఓటు వేయాలని ఇరువర్గాలు ప్రచారం చేస్తుండగా వివాదం మొదలైంది.
ఒకరిపై ఒకరు పిడిగుద్దులు, రాళ్లు, కర్రలతో దాడి చేసుకున్నారు.

పార్టీ శ్రేణుల మధ్య ఘర్షణ...

సూర్యాపేట జిల్లాలోనే మఠంపల్లి మండలం రఘనాథపాలెంలోనూ ఇదే పరిస్థితి. ఓటర్లు ఓటు వేస్తుండగా గులాబీ-హస్తం పార్టీల సభ్యులు ప్రచారానికి దిగారు. ఈ నేపథ్యంలో వారి మధ్య వివాదం తలెత్తింది. విషయం తెలుసుకున్న పోలీసులు ఇరువర్గాలను చెదరగొట్టారు.

ఎన్నికలు బహిష్కరించినా పట్టించుకోని అధికారులు...

ఆదిలాబాద్​ జిల్లా సిరికొండ మండలం రాంజీగూడ, నేరేడుగొండ(కె) గ్రామస్థులు పోలింగ్​ను బహిష్కరించారు. తమ రెండు గ్రామాలను కలిపి గ్రామపంచాయతీగా ఏర్పాటు చేయాలని డిమాండ్​ చేస్తూ ఎవరూ పోలింగ్​ కేంద్రాలకు వెళ్లలేదు. ఇటీవల జరిగిన లోక్​సభ, పంచాయతీ ఎన్నికలను బహిష్కరించినా అధికారులు తమ వినతిని పట్టించుకోవడంలేదని వారంతా ఆగ్రహం వ్యక్తం చేశారు.

బ్యాలెట్​ పత్రం తారుమారు... పోలింగ్​ నిలిపివేత...

మంచిర్యాల జిల్లా హాజీపూర్​ మండలం బుద్దిపల్లిలో బ్యాలెట్​ పత్రం తారుమారైంది. బుద్దెపల్లికి ఎంపీటీసీ స్థానానికి రాపెల్లి అభ్యర్థుల బ్యాలెట్ పేపర్ ఇచ్చినట్లు కాంగ్రెస్​ అభ్యర్థి గుర్తించారు. వెంటనే అధికారులకు ఫిర్యాదు చేయగా పోలింగ్​ను నిలిపేశారు.

సిద్దాపూర్​ను మండల కేంద్రం చేయాలి...

నాగర్ కర్నూల్ జిల్లా సిద్దాపూర్ గ్రామాన్ని మండల కేంద్రంగా ప్రకటించాలని డిమాండ్ చేస్తూ ఓటర్లంతా ఎన్నికలకు దూరంగా ఉన్నారు. అధికారులు బుజ్జగింపులతో శాంతించి.. ఓటేశారు.

తెరాస, కాంగ్రెస్ వర్గీయుల మధ్య వాగ్వాదం...

జగిత్యాల జిల్లా పొలాసలో తుదివిడత ఎన్నికల్లో తెరాస, కాంగ్రెస్ వర్గాల మధ్య గొడవ జరిగింది. సమస్యాత్మక ప్రాంతంగా గుర్తించిన పొలాసలో కాంగ్రెస్ వర్గీయులు పోలింగ్ కేంద్రం లోపలికి వెళ్తున్నారని తెరాస వర్గీయులు వాగ్వాదానికి దిగారు. విషయం గమనించిన పోలీసులు ఇరువర్గాలను శాంతింపజేసి బయటకు పంపించారు.

విధుల్లో ఉన్న ఏపీవోకు గుండెపోటు...

వికారాబాద్​ జిల్లా నవాబుపేట మండలం చించల్​పేటలో ఏర్పాటు చేసిన పోలింగ్​ కేంద్రంలో విధుల్లో ఉన్న అసిస్టెంట్​ ప్రిసైడింగ్​ ఆఫీసర్ వెంకటయ్య​కు గుండెపోటు వచ్చింది. స్థానికంగా ఉన్న ఓటర్లు, అధికారులు అతన్ని ఆస్పత్రికి తరలించారు.