భాగ్యనగరంలో 450 కిలోల గంజాయి పట్టివేత

విశాఖ నుంచి మహారాష్ట్రకు గంజాయిని తరలిస్తున్న వేర్వేరు కేసుల్లో నలుగురు వ్యక్తులను రాచకొండ పోలీసులు అరెస్టు చేశారు. వీరి నుంచి 450కిలోల గంజాయిని రెండు కార్లు, 4 చరవాణులు, లక్షా 50వేల నగదును స్వాధీనం చేసుకున్నారు. వీటి మొత్తం విలువ 55లక్షలు ఉంటుందని రాచకొండ సీపీ మహేశ్ భగవత్ తెలిపారు.

ఆంధ్రప్రదేశ్​లోని విశాఖ మన్యం నుంచి మహరాష్ట్రకు అక్రమంగా తరలిస్తున్న భారీ మొత్తంలో గంజాయిని వేరువేరు ఘటనల్లో హైదరాబాద్​ ఎల్బీనగర్​ పోలీసులు పట్టుకున్నారు. ఓ కేసులో ముగ్గురు నిందితులను అరెస్టు చేసి 300 కిలోల గంజాయి 1.50లక్షల నగదు, కారు మూడు చరవాణులు స్వాధీనం చేసుకున్నట్లు తెలిపారు.

మరో కేసులో వెంకన్న అనే వ్యక్తిని అరెస్టు చేసినట్లు వెల్లడించారు. ఇంజినీరింగ్ పూర్తిచేసి గేట్‌లో ఉత్తీర్ణుడై ఎన్ఐ​టీలో చేరిన తరువాత చెడువ్యసనాలకు బానిసై డబ్బుకోసం గంజాయి సరఫరా చేస్తున్నట్లు సీపీ వివరించారు. నిందితుడు గంజాయిని మహారాష్ట్రకు తీసుకువెళుతుండగా అరెస్టు చేసి అతని నుంచి 150కిలోల గంజాయి ఒక కారు చరవాణి స్వాధీనం చేసుకున్నామని సీపీ తెలిపారు..

ఇవీ చూడండి:పసివాడి శరీరంలో 12 సూదులు.. ఎలా తట్టుకున్నాడో పాపం.!