పీజీఈసెట్ పరీక్ష షెడ్యూల్ నిర్ణయించిన ఉన్నత విద్యామండలి ఎంటెక్, ఎంఫార్మసీ కోర్సుల్లో ప్రవేశాల కోసం నిర్వహించే పీజీఈసెట్ షెడ్యూలును ఉన్నత విద్యామండలి ఖరారు చేసింది. హైదరాబాద్లో ఛైర్మన్ పాపిరెడ్డి అధ్యక్షతన సమావేశమైన అధికారులు ఈ మేరకు నిర్ణయం తీసుకున్నారు. రాష్ట్రంలో 129 ఇంజినీరింగ్ కళాశాలల్లో ఎంటెక్, 96 కాలేజీల్లో ఎంఫార్మసీ, 14 ఫార్మా-బి కాలేజీలు అందుబాటులో ఉన్నాయి. వీటిల్లో సీట్ల భర్తీకి నిర్వహించే ప్రవేశ పరీక్షకు మార్చి 6న నోటిఫికేషన్ జారీ చేయాలని అధికారులు నిర్ణయించారు. మార్చి 13 నుంచి ఏప్రిల్ 30 వరకు ఆన్లైన్లో దరఖాస్తులు స్వీకరిస్తారు. ఎస్సీ, ఎస్టీలు 500 రూపాయలు.. ఇతర అభ్యర్థులు 1000 రూపాయలు దరఖాస్తు రుసుము చెల్లించాలి. మే 25 వరకూ అపరాధ రుసుముతో దరఖాస్తు చేసుకునేందుకు అవకాశం కల్పించారు.
మే 22 నుంచి 27 వరకు వెబ్సైట్లో హాల్ టికెట్లు అందుబాటులో ఉంటాయని పీజీఈసెట్ కన్వీనర్ కుమార్ తెలిపారు. హైదరాబాద్, వరంగల్లలో పరీక్ష కేంద్రాలను ఏర్పాటు చేసినట్లు పేర్కొన్నారు. మే 28 నుంచి 31 వరకూ ఆన్లైన్లో పరీక్ష నిర్వహిస్తామని.. అభ్యర్థులు గమనించాలని సూచించారు. ఉదయం 10 నుంచి 12 వరకూ.. మధ్యాహ్నం 2 నుంచి 5 వరకూ పరీక్ష జరగనున్నట్లు కన్వీనర్ తెలిపారు.
