ప్రమాదాల్లో పాదచారులే అధికం.. వంతెనల నిర్మాణాజాప్యమే కారణం

రయ్యిమని దూసుకొచ్చే వాహనాలు.. దాటేందుకు వీల్లేని రద్దీ. వెరసి నిత్యం ఏదో ఓచోట ప్రమాదాలతో నగరంలో పాదచారులు బెంబేలెత్తిపోతున్నారు. అందుబాటులోకి రాని కాలిబాట వంతెనలు, ఉన్నవాటి నిర్వహణలో నిర్లక్ష్యం, ఆక్రమణలు, పెలికాన్‌ సిగ్నల్స్‌, జీబ్రా క్రాసింగ్‌లు కనిపించకపోవడంతో పాదచారుల భద్రత ప్రశ్నార్థకమవుతోంది.

భాగ్యనగరంలో ఏటా జరిగే రోడ్డుప్రమాదాల్లో మరణించే వారిలో ద్విచక్ర వాహనదారులు మొదటి స్థానంలో ఉంటే పాదచారులు రెండోస్థానంలో ఉన్నట్లు నివేదికలు చెబుతున్నాయి. గతేడాది జరిగిన ప్రమాదాల బాధితుల్లో పాదచారులు 35 శాతానికిపైగా ఉన్నారంటే పరిస్థితులను అర్థం చేసుకోవచ్ఛు ఇటీవల నగరానికి చెందిన ‘ఫుట్‌పాత్‌ ఇనీషియేటివ్‌’ స్వచ్ఛంద సంస్థ అధ్యయనంలోనూ పాదచారులకు భద్రత కొరవడినట్లు స్పష్టమవుతోంది. 6 ప్రమాదకర దారుల్ని సంస్థ గుర్తించింది.

రెండేళ్ల క్రితం ప్రారంభించి అమీర్‌పేటలో ఆగిపోయిన ఎఫ్‌ఓబీ నిర్మాణం

కొత్తవి కట్టరు.. పాతవి పట్టించుకోరు

పాదచారుల కోసం ట్రాఫిక్‌ పోలీసులు, కన్సల్టెన్సీ ఇచ్చిన నివేదికల ఆధారంగా 2014లో బంజారాహిల్స్‌, జూబ్లీహిల్స్‌, ఖైరతాబాద్‌, పంజాగుట్ట, హైటెక్‌సిటీ వంటి ప్రాంతాల్లో 55 ఫుట్‌ ఓవర్‌ బ్రిడ్జి (ఎఫ్‌ఓబీ)లను నిర్మించాలని జీహెచ్‌ఎంసీ నిర్ణయించింది. టెండర్ల ప్రక్రియ పూర్తయినా గుత్తేదారులు మందుకు రాకపోవడంతో 44 ఎఫ్‌బీఓల నిర్మాణ బాధ్యతల్ని హెచ్‌ఎండీఏకు బల్దియా బదిలీ చేసింది. అక్కడా అదే పరిస్థితి. గతేడాది డిసెంబరులో కొత్తగా 52 ఎఫ్‌ఓబీలకు ప్రతిపాదనలు రూపొందించగా ప్రభుత్వం పచ్చజెండా ఊపినా పనులు మొదలు కాలేదు.

మెట్రో వంతెనలు ఉన్నా..

మెట్రోస్టేషన్లను రహదారులు దాటేందుకు వినియోగించుకోవచ్ఛు అయినా అవగాహన లేక ఎక్కువ మంది వీటిని వినియోగించుకోవడం లేదు. పాదచారుల ప్రమాదాలకు వాహనదారుల అతివేగం కారణం కాగా ఆదరాబాదరాగా రోడ్డు దాటుతుండటం మరో కారణం.

ఇదీ చదవండిఃకదులుతున్న కంటైనర్లే టార్గెట్.. రెక్కీ చేస్తే పనైపోయినట్టే!