'అందరి చేత కన్నీరు తెప్పించిన ఆ కార్పొరేటర్​ను శిక్షించాలి'

బొడుప్పల్ కార్పొరేషన్ పరిధిలో పట్టపగలే ఓ ఇంటి యజమాని మీద తెరాస కార్పొరేటర్​ భర్త దాడికి దిగడం దారుణమని పీసీసీ కోశాధికారి గూడూరు నారాయణ రెడ్డి అన్నారు. 'మా నాన్నను కొట్టొద్దు' అంటూ చిన్న పిల్లవాడు ఏడుస్తున్నా... ఇష్టానుసారంగా కొట్టారని.. ఆ దృశ్యాలు ప్రతి ఒక్కరినీ కన్నీరు పెట్టిస్తోందని చెప్పారు.

భూ వివాదంలో తలదూర్చడమే కాకుండా ప్రశ్నించిన వ్యక్తిపై బొడుప్పల్ కార్పొరేషన్ తెరాస కార్పొరేటర్​ భర్త దాడికి దిగడం అమానుషం అన్నారు పీసీసీ కోశాధికారి గూడూరు నారాయణ రెడ్డి. దాడికి పాల్పడిన వారిని కఠినంగా శిక్షించాలని డిమాండ్​ చేశారు.

గూండాగిరి, దాదాగిరి పోవాలంటే ఇలాంటి వారిని ఎన్‌కౌంటర్‌ చేయిస్తేనే.. ఇతర అసాంఘిక శక్తులు భయపడతాయన్నారు. శ్రీధర్‌గౌడ్‌తోపాటు దాడిలో పాల్గొన్న వారందరిపై హత్యాయత్నం కేసులు నమోదు చేయాలని కోరారు. దాడికి పాల్పడిన వారందరిని శిక్షించాలని శాంతి భద్రతల అదనపు డీజీ జీతేందర్​ కోరినట్లు తెలిపారు.