ప్రధాని మోదీ కరోనా వ్యాక్సిన్ పేరుతో డ్రామా చేస్తున్నారని ఆరోపించారు పీసీసీ అధ్యక్షుడు ఉత్తమ్కుమార్ రెడ్డి. మోదీ రాకపోతే వ్యాక్సిన్ తయారు కాదా అని ఎద్దేవా చేశారు. హైదరాబాద్ గాంధీభవన్లో మీడియాతో మాట్లాడిన ఆయన... భాజపా నాయకుల ప్రవర్తన హైదరాబాద్ వాసులను అవమానపరిచేలా ఉందన్నారు. వరదలు వచ్చినప్పుడు హోంమంత్రిగా పరామర్శ చేయని అమిత్షా... మున్సిపల్ ఎన్నికల్లో ఓట్ల కోసం వస్తారా అని ప్రశ్నించారు.
యూపీ సీఎం యోగి ఆయన రాష్ట్రంలో మహిళలపై దాడులు జరుగుతుంటే మిన్నకుండిపోయారు. రాష్ట్రంలో అవినీతి పాలన జరుగుతుంటే కేంద్ర సంస్థలు ఏం చేస్తున్నాయి? యూపీ సీఎం వచ్చి హైదరాబాద్ పేరు మారుస్తామంటారు. మీరు ఎవరు ఆ మాట అనడానికి? కేంద్రం... హైదరాబాద్కు ఏం చేసింది. గ్రేటర్ అభివృద్ధి జరిగిందంతా కాంగ్రెస్ హయాంలోనే. పాతబస్తీపై సర్జికల్ స్ట్రైక్ చేస్తారా? కేసీఆర్ సభ అట్టర్ఫ్లాప్ అయింది.