కొవిడ్‌ నేపథ్యంలో బస్సుల్లో శానిటైజర్లను ఏర్పాటు చేశారు. మాస్క్‌ ఉంటేనే అనుమతించాలని నిర్ణయించారు. అయినా ప్రజలకు ప్రయాణాలపై విశ్వాసం పెరగడంలేదు. ఆర్టీసీ ప్రస్తుతం సగటున 4,500 నుంచి 4,900 వాహనాలను నడుపుతోంది. హైదరాబాద్‌లో సిటీ సర్వీసులను ఇంకా నడపడంలేదు. అంతర్‌ రాష్ట్ర సర్వీసులు నడిపేందుకు తాము సిద్ధంగా ఉన్నామని ఏపీఎస్‌ఆర్టీసీ తెలంగాణ ప్రభుత్వానికి లేఖ రాసింది. దీనిపై రాష్ట్ర ప్రభుత్వం మరికొద్ది రోజులు వేచి చూడాలని నిర్ణయించింది. ఆర్టీసీ ఆక్యుపెన్సీ సగానికి పైగా తగ్గి 35.37 శాతంగా నమోదైంది. కరోనా తీవ్రతకు ముందు అది 74 నుంచి 76 శాతం ఉండేది.
రోజుకు సుమారు రూ.12 కోట్లు వచ్చే ఆదాయం రూ.3.50 కోట్లకు తగ్గిపోయింది. గత నెల 19 నుంచి ఆర్టీసీ బస్సులను పునఃప్రారంభించింది. తొలిరోజుల్లో 28 శాతం ఆక్యుపెన్సీ నమోదైంది. అనంతరం కొద్దిగా పుంజుకుంది.