తెలంగాణ

telangana

ETV Bharat / state

Sparsh Hospice: చివరి క్షణాల్లో ఆత్మీయ స్పర్శతో భరోసానిస్తున్న స్పర్శ్‌ - తెలంగాణ తాజా వార్తలు

క్యాన్సర్ లాంటి దీర్ఘకాలిక వ్యాధులతో పోరాడుతూ అంతిమ దశకు చేరిన వారికి హైదరాబాద్​లోని స్పర్శ్ హాస్పిస్ ఆత్మీయ నేస్తంగా నిలుస్తోంది. పేద, ధనిక, కుల మతాలకతీతంగా ప్రతి ఒక్కరికి ఉచితంగా సేవలందిస్తూ ఆఖరి ఘడియల్లో స్వాంతన చేకూరుస్తోంది. మనిషి పుట్టక నుంచి పెరిగేంత వరకు ఎంత గొప్పగా జీవించాడో... మరణానికి కూడా అంతే గౌరవాన్ని అందించాలనే సంకల్పంతో పనిచేస్తోన్న స్పర్శ్ హాస్పిస్... క్యాన్సర్ కారణంగా అవసాన దశలో ఉన్నవారికి ఆలంబనగా నిలుస్తూ పాలియేటివ్ కేర్ సేవల్లో దక్షణాదిన అగ్రగామిగా నిలుస్తోంది.

Sparsh Hospice
Sparsh Hospice

By

Published : Sep 6, 2021, 9:09 AM IST

ఆస్పత్రుల్లో బతుకు పోరాటం చేసి ఆఖరి దశకు చేరిన రోగులకు, వారి కుటుంబ సభ్యులకు హైదరాబాద్​లోని స్పర్శ్ హాస్పిస్ పాలియేటివ్ కేర్ సెంటర్ అండగా నిలుస్తోంది. వివిధ రకాల క్యాన్సర్లతో బాధపడుతూ చివరి దశకు చేరిన రోగులను అక్కున చేర్చుకొని ఆత్మీయంగా పలకరిస్తోంది. చివరి క్షణాల్లో అనుభవించే మనోవేదన నుంచి బయటపడేస్తోంది. రోగులను ఇంట్లో ఉంచి సేవలు చేసేందుకు అనువుగా లేని పేద, మధ్యతరగతి కుటుంబాలకు ఆసరాగా నిలుస్తూ వారిలో ధైర్యాన్ని నింపుతోంది.

అద్దె భవనంలో మొదలై..

డాక్టర్ సుబ్రహ్మణ్యం మద్దిరాల ఆధ్వర్యంలో రోటరీ క్లబ్ ఆఫ్ బంజారాహిల్స్ స్వచ్ఛంద సంస్థ 2011లో రోడ్ నం.12లో ఓ అద్దె భవనంలో ఈ స్పర్శ్ హాస్పిస్ సేవలను ప్రారంభించారు. 12 పడకలతో స్పర్శ్ హాస్పిస్ సేవలు మొదలయ్యాయి. మొదట్లో పాలియేటివ్ కేర్ సేవలపై ప్రజల్లో అవగాహన లేకపోవడంతో పెద్దగా రోగులు రాలేదు. క్రమంగా స్పర్శ్ హాస్పిస్ సేవలపై విస్తృత ప్రచారం జరగడంతో తెలుగు రాష్ట్రాలతోపాటు ఒడిశా, ఛత్తీస్ గఢ్, మహారాష్ట్ర, కర్ణాటక రాష్ట్రాల నుంచి రోగుల రాక మొదలైంది. తెలుగు రాష్ట్రాల్లో సగటున ఏడాదికి లక్ష క్యాన్సర్ కేసులు నమోదవుతున్నాయి. వారిలో 50 శాతం మందే క్యాన్సర్ నుంచి కోలుకుంటుండగా మిగతా సగం మంది ఎన్నో బాధలు అనుభవిస్తూ తనువు చాలిస్తున్నారు. ఒక్క హైదరాబాద్ మహానగరంలో రోజుకు 200 నుంచి 300 మంది క్యాన్సర్ రోగులు టెర్మినల్ అవుతున్నారు. బసవతారకం ఇండో -అమెరికన్ ఆస్పత్రితో పాటు ఏంఎన్​జే లాంటి క్యాన్సర్ ఆస్పత్రిల్లో రోజుకు పెద్ద సంఖ్యలో టెర్మినల్ కేసులు నమోదవుతున్నాయి. ఇలా ప్రభుత్వ, ప్రైవేటు ఆస్పత్రుల్లో క్యాన్సర్​తో టెర్మినల్ అవుతున్న వారందరిని అక్కున చేర్చుకోవాలని స్పర్శ్ హాస్పిస్ నిర్ణయించింది.

అనుభవజ్ఞులైన వైద్యులతో..

పాలియేటివ్ కేర్​లో సుమారు 10 ఏళ్ల అనుభవం, ప్రత్యేకంగా శిక్షణ పొందిన వైద్యులు, వైద్య సిబ్బంది, స్వచ్ఛంద కార్యకర్తలు ఉండటంతో ఇన్​పేషంట్స్​కే కాకుండా హోంకేర్ సేవలను విస్తృతం చేసింది. అయితే ఈ సేవలను మరింత మందికి చేరువ చేయాలనే లక్ష్యంతో తెలంగాణ ప్రభుత్వ సహకారంతో ఖాజాగూడలో ఎకరా స్థలంలో స్పర్శ్ హాస్పిస్​కు సొంత భవనాన్ని నిర్మించుకున్నారు. అధునాతన భవనంలో పూర్తి వసతులతో 82 పడకలు ఏర్పాటు చేశారు. ఈసారి చిన్నారుల కోసం ప్రత్యేకంగా 10 పడకలను పిడియాట్రిక్ వార్డుగా కేటాయించారు. ముగ్గురు వైద్యులు, 30 మందికిపైగా నర్సింగ్ సిబ్బంది రోగులకు నిరంతరం ఇక్కడ అందుబాటులో ఉంటారు.

అంతిమ దశలో గౌరవంగా..

క్యాన్సర్ రోగి టెర్మినల్ అని వైద్యుడు ధ్రువీకరించాకే స్పర్శ్ హాస్పిస్​లో చేర్చుకుంటారు. రోగితో తప్పనిసరిగా డిశ్చార్జ్ ఫైల్ తీసుకొని రావాలి. రోగిని స్పర్శ్ హాస్పిస్​లో చేర్చే క్రమంలో వెంట ఒకరు తప్పనిసరిగా ఉండాలి. ఒకవేళ లేకపోతే నమ్మకం కలిగిన వ్యక్తులను అడెంటర్​గా పెట్టుకునే అవకాశం ఉంది. 9963504253, 9052893630 నంబర్లకు ఫోన్ చేసి టెర్మినల్ అయిన రోగిని తీసుకెళ్లి ఈ కేంద్రంలో చేర్చవచ్చు. అయితే ఇక్కడ ఇన్​పేషంట్​గా అడ్మిట్ అయిన రోగి ఎన్ని రోజులు బతికి ఉంటారనేది కచ్చితంగా చెప్పలేం. కొంత మంది 2 నుంచి 3 వారాలుంటే... మరికొంత మంది 3 నుంచి 4 నెలలు కూడా ఉంటారు. ఆలోగా వారికి అన్నిరకాల సేవలతోపాటు వారి చిన్న చిన్న కోరికలను తీరుస్తూ చక్కగా చూసుకుంటారు. తుదిశ్వాస విడిచాక కూడా ఎంతో గౌరవంగా వారి మృతదేహాలను ఇళ్లకు చేరుస్తారు. చిల్లిగవ్వలేని నిరుపేదలైతే స్పర్శ్ హాస్పిస్ కేంద్రం నుంచే ఉచితంగా అంబులెన్స్ సౌకర్యాన్ని కల్పిస్తారు.

దక్షిణాదిలోనే అగ్రగామిగా..

ఇలా... పాలియేటివ్ కేర్​లో స్పర్శ్ హాస్పిస్ దక్షిణాదిలోనే అగ్రగామిగా ఉత్తమ సేవలందిస్తోంది. దేశవ్యాప్తంగా కేరళ ఈ సేవల్లో ముందుడగా అదే తరహాలో తెలుగు రాష్ట్రాల్లోనూ తన సేవలను విస్తరించాలని స్పర్శ్ హాస్పిస్ యోచిస్తోంది. స్వచ్ఛంద సంస్థలు, ప్రభుత్వ సహకారంతో తెలుగు రాష్ట్రాల్లోని ప్రతి జిల్లాలోనూ స్పర్శ్ హాస్పిస్ కేంద్రాలను ఏర్పాటు చేసేందుకు సిద్ధంగా ఉన్నామని ఆ సంస్థ సీఈవో రాంమోహన్ రావు వెల్లడించారు.

ప్రతి జిల్లాలోనూ రావాలి..

మృత్యు ముంగిట్లో క్షణాలు లెక్కపెడుతున్న వారికి గౌరవప్రదమైన మరణాన్ని ప్రసాదించేందుకు ఇలాంటి స్పర్శ్ హాస్పిస్ కేంద్రాలు మరిన్ని రావాల్సిన అవసరం ఎంతైనా ఉంది. ప్రభుత్వం ఈ దిశగా ఆలోచన చేస్తోన్న సత్వరమే ప్రతి జిల్లా కేంద్రానికి ఒక పాలియేటివ్ కేర్ సెంటర్ ఏర్పాటు చేస్తే ఎంతో మంది నిరుపేద, మధ్యతరగతి కుటుంబాలకు ఊరట కలుగుతుంది.

ఇదీ చూడండి:యువకుల సాహసం.. వాగు దాటించేందుకు మానవహారం!

ABOUT THE AUTHOR

...view details