బ్యాగులో చిరుత
నిండా నెల వయసు లేదు. కనీసం పరిగెత్తే శక్తి కూడా లేదు. అలాంటి ఓ చిన్నారి చిరుతను.. ఓ ప్రయాణికుడు కనికరం లేకుండా బ్యాగులో కుక్కేశాడు. చివరికి కటకటాలపాలయ్యాడు.
పేరుకు క్రూర మృగమైనా.. ఇంకా నిండా నెల వయసు లేదు. కనీసం పరిగెత్తే శక్తి కూడా లేదు. అలాంటి ఓ చిన్నారి చిరుతను.. ఓ ప్రయాణికుడు కనికరం లేకుండా బ్యాగులో కుక్కేశాడు. ఎవరి కంటా పడకుండా తనతో తీసుకెళ్లాలని అనుకున్నాడు. కానీ అతని పన్నాగం పారలేదు. చెన్నై విమానాశ్రయ సిబ్బంది.. ఈ విషయాన్ని పసిగట్టేశారు. ప్రయాణికుడి బ్యాగేజ్ నుంచి చిరుతను కాపాడారు. బయటికి తీసి.. పాలు పట్టించేందుకు ప్రయత్నించారు. ప్రాణభయంతో బిక్కుబిక్కుమంటున్న చిరుతను చూసిన వారంతా ఆవేదన చెందారు.
చిరుతకు సపర్యలు చేసిన విమానాశ్రయ సిబ్బంది.. చెన్నైలోని అరింగర్ అన్నా జూపార్కు అధికారులకు అప్పగించారు. ఆ చిరుతను పట్టుకెళ్లేందుకు ప్రయత్నించిన ప్రయాణికుడిని అదుపులోకి తీసుకున్నారు. విచారణ నిమిత్తం తమిళనాడు అటవీశాఖ అధికారులకు అప్పగించారు. ఈ విషయాన్ని సామాజిక మాధ్యమాల్లో గమనించిన జంతు ప్రేమికులు ఆగ్రహం వ్యక్తం చేశారు. చిరుతను బ్యాగులో కుక్కినట్టే... పట్టుబడిన ప్రయాణికుడినీ బ్యాగులో కుక్కి, ఊపిరి ఆడకుండా చేయాలన్నారు.