సెకండ్ ఛాన్స్... సింగరేణిలో వారికి మళ్లీ ఉద్యోగం

గత ఎనిమిదేళ్లలో వివిధ కారణాలతో ఉద్యోగం నుంచి తొలగించిన కార్మికులను మళ్లీ చేర్చుకోవాలని సింగరేణి సంస్థ నిర్ణయించింది. ఈ మేరకు సింగరేణి యాజమాన్యం, తెలంగాణ బొగ్గు గని కార్మిక సంఘానికి మధ్య ఇవాళ ఒప్పందం కుదిరింది.

వివిధ కారణాలతో ఉద్యోగం కోల్పోయిన సింగరేణి కార్మికులను తిరిగి విధుల్లోకి తీసుకోనున్నారు. ఈ మేరకు సింగరేణి యాజమాన్యం, తెలంగాణ బొగ్గు గని కార్మిక సంఘానికి మధ్య ఇవాళ ఒప్పందం కుదిరింది. ఈ ఒప్పందంతో సుమారు 356 మందికి తిరిగి ఉద్యోగాలు దక్కనున్నాయి. డిస్మిస్ అయిన ఉద్యోగులు, గుర్తింపు కార్మిక సంఘం వినతిపై ముఖ్యమంత్రి కేసీఆర్ సానుకూలంగా స్పందించడం వల్ల సింగరేణి డైరెక్టర్ ఎస్.చంద్రశేఖర్, గుర్తింపు కార్మిక సంఘం అధ్యక్షుడు బి.వెంకట్రావు సమక్షంలో ఒప్పందాలు జరిగాయి.

46 ఏళ్లు దాటొద్దు...

ఒప్పందం ప్రకారం 2000 సంవత్సరం జనవరి 1 నుంచి గతేడాది డిసెంబరు 31 వరకు అనారోగ్యం కారణంగా ఉద్యోగం కోల్పోయిన కార్మికులు తిరిగి ఉద్యోగం పొందేందుకు అర్హులు. డిస్మిస్ అయ్యే నాటికి ముందు ఐదేళ్లలో కనీసం రెండేళ్లకాలంలో వంద హాజరు దినాలు పూర్తి చేసి ఉండాలని.. 46ఏళ్ల వయసు దాటి ఉండొద్దని నిబంధన విధించారు. అలాగే గతంలో డిస్మిస్ అయి, తిరిగి ఉద్యోగంలో చేరి.. మొదటి సంవత్సరంలో కనీసం 190 మస్టర్లు కూడా పూర్తి చేయక మళ్లీ ఉద్యోగం కోల్పోయిన వారికి కూడా మరో అవకాశాన్ని కల్పించారు. తిరిగి ఉద్యోగంలో చేరాలనుకునే అర్హులైన కార్మికులు వైద్య పరీక్షలలో ఫిట్ కావాల్సి ఉంటుంది.

ఇవీ చూడండి:30రోజుల ప్రణాళికతో "పల్లె" ప్రగతి మారుతుంది