LRS: ఎల్​ఆర్ఎస్ దరఖాస్తుల వర్గీకరణపై అధికారుల కసరత్తు

రాష్ట్రంలో లేఅవుట్ల క్రమబద్ధీకరణ దరఖాస్తుల్లో నిబంధనలకు అనుగుణంగా ఉన్న వాటిని గుర్తించే ప్రక్రియకు అధికారులు శ్రీకారం చుట్టారు. సుప్రీంకోర్టు తుది తీర్పుకు లోబడే ఎల్ఆర్ఎస్ దరఖాస్తులపై ప్రభుత్వం తుది నిర్ణయం తీసుకోనున్నట్లు తెలుస్తోంది. ముందస్తు ప్రక్రియలో భాగంగా రాష్ట్ర వ్యాప్తంగా గ్రామీణ, పట్టణ, నగర ప్రాంతాల్లో లేఅవుట్ క్రమబద్ధీకరణ పథకంలో వచ్చిన 25.50 లక్షల దరఖాస్తులను సమగ్రంగా పరిశీలించనున్నారు. గ్రామ పంచాయతీలు, పురపాలక సంఘాలు, నగరపాలక సంస్థల్లోని ఎల్ఆర్ఎస్ దరఖాస్తుల వర్గీకరణపై పంచాయతీ, పురపాలక అధికారుల కసరత్తును ప్రారంభించారు.

రాష్ట్రవ్యాప్తంగా ఎల్ఆర్ఎస్(LRS)​కు అత్యధికంగా గ్రామ పంచాయతీల నుంచి దరఖాస్తులు వచ్చాయి. గ్రామ పంచాయతీల్లో 10,83,394 దరఖాస్తులు రాగా, పురపాలక సంఘాల పరిధిలో 10,60,013 దరఖాస్తులు, నగరపాలక సంస్థల్లో 4,16,155 దరఖాస్తులు వచ్చాయి. రాష్ట్ర ప్రభుత్వం ఇటీవల ఇచ్చిన ఆదేశాల నేపథ్యంలో మొదటిగా ఎఆర్ఎస్ దరఖాస్తుల క్లస్టరింగ్​ను ప్రారంభించారు. ఇందులో భాగంగా దరఖాస్తుల వివరాలను క్షేత్ర స్థాయి అధికారులకు గత రెండు రోజులుగా అందుబాటులోకి తీసుకొచ్చారు.

వివిధ అంశాల ఆధారంగా...

దరఖాస్తులను పంచాయతీ, పురపాలక అధికారులు వివిధ అంశాల ప్రాతిపదికన వర్గీకరించనున్నట్లు తెలుస్తోంది. గ్రామం, సర్వే నెంబర్​, ప్రాంతం, కాలనీల వారీగా ఎన్నెన్ని దరఖాస్తులు ఉన్నాయో అన్ని రకాలుగా విభజించనున్నారు. ఎల్ఆర్ఎస్​కు అవకాశం కల్పిస్తూ రాష్ట్ర ప్రభుత్వం గత ఏడాది అవకాశం కల్పించింది. అనుమతించని లేఅవుట్లు, అనధికార ప్లాట్ల రిజిస్ట్రేషన్లను నిలిపివేస్తూ ప్రభుత్వం ఉత్తర్వులు జారీ చేయడంతో భారీ సంఖ్యలో ఎల్‌ఆర్‌ఎస్ దరఖాస్తులు వచ్చాయి.

నిబంధనలకు అనుగూణంగా...

దరఖాస్తుల స్వీకరణ అనంతరం ఎల్‌ఆర్‌ఎస్ అంశం కోర్టులకు చేరడంతో ఈ ప్రక్రియ ఆరునెలలుగా నిలిచిపోయింది. తాజాగా ఎల్​ఆర్​ఎస్ దరఖాస్తుల్లో నిబంధనలకు అనుగుణంగా ఉండి, క్రమబద్ధీకరణకు అవకాశం ఉన్న వాటిని గుర్తించాలని ప్రభుత్వం నిర్ణయించింది. ఇందులో భాగంగా పురపాలక శాఖ ముఖ్యకార్యదర్శి అర్వింద్ కుమార్ ఉత్తర్వులు జారీ చేశారు. మొదటి దశలో భాగంగా ఎల్ఆర్ఎస్ దరఖాస్తులను వర్గీకరణ ( క్లస్టరింగ్) చేయాలని, రెండో దశలో భాగంగా లేఅవుట్లు క్షేత్ర స్థాయి పరిశీలన చేసి నిబంధనలు అనుగుణంగా ఉన్న వాటిని గుర్తించాలని పేర్కొన్నారు.

తొలి దశ పూర్తి...

ఈ ప్రక్రియ కోసం రెవెన్యూ, పంచాయతీ రాజ్, నీటిపారుదల శాఖలు, పట్టణ ప్రణాళిక అధికారులతో బృందాలను ఏర్పాటు చేయాలని కలెక్టర్లను ఆదేశించారు. బృందాలు పరిశీలించిన అనంతరం రిమార్క్​లతో నివేదికలను కలెక్టర్లు, పురపాలక కమిషనర్లకు అందచేయాల్సి ఉంటుంది. 15 రోజుల్లో దీన్ని పూర్తి చేయాలని ఆదేశించగా ప్రస్తుతం తొలి దశ ప్రక్రియ మొదలైంది. సాధ్యమైనంత త్వరగా దీన్ని పూర్తి చేయాలని పురపాలక, పంచాయతీరాజ్ అధికారులను ప్రభుత్వం ఆదేశించింది.

సిబ్బందికి ఆదేశాలు...

అత్యంత ప్రాధాన్య కార్యక్రమంగా దీన్ని చేపట్టాలని అధికారులు క్షేత్రస్థాయి సిబ్బందికి ఆదేశించారు. పంచాయతీ కార్యదరులు వారి వారి పరిధిలోని వాటిని కస్టరింగ్ చేయడానికి వీలుగా ఫిల్మస్ దరఖాస్తుల వివరాలను అందచేశారు. ఎల్‌ఆర్‌ఎస్ అంశం న్యాయస్థానాల పరిధిలో ఉన్నా క్రమబద్ధీకరణకు అర్హత కలిగిన వాటిని గుర్తిస్తున్న అంశంపై ప్రభుత్వ ఉన్నతాధికారులు రెండు అంశాలను పేర్కొంటున్నారు. క్రమబద్ధీకరణకు అర్హత కలిగిన దరఖాస్తులు వీటితో ముడిపడి ఉన్న కుటుంబాలు తదితర అంశాలను న్యాయస్థానాలకు వివరించడం ప్రధాన అంశంగా వివరిస్తున్నారు. న్యాయస్థానాల్లో క్రమబద్ధీకరణకు అనుకూలంగా తీర్పు వచ్చిన వెంటనే జాప్యం లేకుండా ఎల్ఆర్ఎస్ ప్రక్రియలో ముందుకు వెళ్లడం వీలు కలుగుతుందని పేర్కొంటున్నారు.

ఇదీ చదవండి:PRC: విద్యాశాఖ ఒప్పంద, పొరుగ సేవ ఉద్యోగుల పీఆర్సీపై కసరత్తు