ఓటుకు నోటు కేసు.. విచారణ ఈ నెల 15కు వాయిదా

ఓటుకు నోటు కేసు విచారణను నెల రోజులు వాయిదా వేయాలన్న ఎంపీ రేవంత్ రెడ్డి పిటిషన్​పై నిర్ణయాన్ని... అనిశా న్యాయస్థానం ఈ నెల 15 తేదికి వాయిదా వేసింది. కేసు విచారణను ఉద్దేశపూర్వకంగా జాప్యం చేసేందుకే ఆయన రకరకాల పిటిషన్లు వేస్తున్నారని అనిశా ఆరోపించింది.

పార్లమెంట్​ సమావేశాలు ఉన్నందున ఓటుకు నోటు కేసు విచారణను నెల రోజులు వాయిదా వేయాలన్న ఎంపీ రేవంత్ రెడ్డి పిటిషన్​పై అనిశా న్యాయస్థానం విచారణ చేపట్టింది. సుప్రీంకోర్టు ఆదేశాల మేరకు కేసును త్వరగా తేల్చాల్సిన అవసరం ఉందని ప్రత్యేక పబ్లిక్ ప్రాసిక్యూటర్ సురేందర్ రావు వాదనలు వినిపించారు.

కేసు విచారణ ప్రక్రియను ఉద్దేశపూర్వకంగా జాప్యం చేసేందుకే రేవంత్​ రెడ్డి రకరకాల పిటిషన్లు వేస్తున్నారని అనిశా ఆరోపించింది. ఇరు వైపుల వాదనలు విన్న న్యాయస్థానం విచారణను ఈనెల 15కు వాయిదా వేసింది. ఈ కేసులో ఆరోపణలు ఎదుర్కొంటున్న ఉదయ్ సింహా నేడు కోర్టు విచారణకు హాజరయ్యారు.

ఇదీ చదవండి: సాగు చట్టాలు, చమురు ధరలపై దద్దరిల్లిన పార్లమెంట్​