ఏ రంగలోనైనా.. ఏ విజయానికైనా... ఉన్నతికైనా సరే అడ్డదారులు ఉండవని వ్యవసాయ శాఖ మంత్రి సింగిరెడ్డి నిరంజన్‌రెడ్డి(niranjan reddy comments) అన్నారు. అడ్డదారుల్లో ఉన్నతంగా ఎదగలేమని... జీవించలేమని స్పష్టం చేశారు. దేనికైనా అవిశ్రాంతంగా కష్టపడాల్సిందేనని సూచించారు. కష్టానికి మించిన ఏ ప్రత్యామ్నాయం లేదని చెప్పారు.
"మీ ప్రవర్తన మీకు చాలా పెద్ద పెట్టుబడి. మీ నడవడిక మీకు చాలాపెద్ద మార్గదర్శి. రెండు రోజులు లేటైనా కానీ ఒక్కసారి మీరు అనుకున్న పద్ధతిలో అడుగులు వేశారంటే చాలా పటిష్ఠమైన పునాది పడుతుంది. మొదలుపెట్టినప్పుడు ఇది మామూలుగానే అనిపిస్తుంది. అందులో ఒకసారి చేరిన తర్వాత ఏమేమి వింతలు చేయవచ్చో అర్థమవుతుంది. వంద రకాల ఆలోచనలు చేయవచ్చు. డిమాండ్ ప్రజల అవసరాలను పెంచుతుంది. ఎక్కడికక్కడ ప్రజల అవసరాలను పెంచితే... ఆటోమేటిక్గా అక్కడ తగిన వ్యాపారం పెరుగుతుంది. ఇది మౌలిక సూత్రం. మొత్తం వచ్చి హైదరాబాద్ మీద పడితే హైదరాబాద్ అందరికీ అవకాశాలు కల్పించే పరిస్థితి ఉండదు కదా. గ్రామీణ ప్రాంతాలు కూడా గొప్పగా జీవించగలగాలి కదా. అక్కడి ప్రజలకు కూడా వసతులు అవసరం కదా. వాళ్ల అవసరాలు కూడా తీరాలి. అవన్నీ జరగాలంటే అక్కడ కూడా కార్యకలాపాలు విస్తరించాలి"
-నిరంజన్ రెడ్డి, వ్యవసాయశాఖ మంత్రి