రాష్ట్రంలో కొత్త రేషన్ కార్డుల జారీకి ప్రభుత్వం శ్రీకారం చుట్టింది. సోమవారం జయశంకర్ భూపాలపల్లి జిల్లాలో రేషన్ కార్డుల జారీ ప్రక్రియను పౌరసరఫరాల శాఖ మంత్రి గంగుల కమలాకర్ ప్రారంభించనున్నారు. అనంతరం రాష్ట్ర వ్యాప్తంగా మంత్రులు, స్థానిక ఎమ్మెల్యేలు, ఎమ్మెల్సీలతో పాటు వివిధ స్థాయిల్లోని ప్రజాప్రతినిధులు ప్రతి మండలం కేంద్రంలో లబ్ధిదారులకు రేషన్ కార్డులు అందించనున్నారని మంత్రి గంగుల కమలాకర్ తెలిపారు. రాష్ట్ర వ్యాప్తంగా ఒక్క పెండింగ్ ధరఖాస్తు కూడా లేకుండా అన్నింటిని పరిశీలించి కార్డులు జారీ చేసినట్లు ఆయన వివరించారు.
కొత్తగా మూడు లక్షల తొమ్మిది వేల 83 రేషన్ కార్డులు
రాష్ట్రవ్యాప్తంగా 4,15,901 కుటుంబాలు కొత్తకార్డులకు ఆన్‌లైన్‌లో అర్జీ పెట్టుకున్నాయి. సాంకేతిక విభాగం వడపోత తరువాత 3,91,112 దరఖాస్తులను పరిశీలనకు తీసుకున్నారు. గడిచిన కొన్ని రోజులుగా పౌరసరఫరాల శాఖ, రెవెన్యూ అధికారులు అర్జీదారుల ఇంటింటికీ వెళ్లి స్థితిగతుల్ని పరిశీలించారు. చివరికి మూడు లక్షల తొమ్మిది వేల 83 కుటుంబాలకు కొత్త రేషన్ కార్డులు ఇవ్వాలని నిర్ణయించారు. మొత్తం 8,65,430 మంది లబ్ధి పొందనున్నారు. వీరికి ప్రతి నెల 6కిలోల బియ్యం ఇవ్వనున్నారు. ఇందుకు నెలకు 5,200 మెట్రిక్ టన్నులు బియ్యం అదనంగా అవసరం అవుతాయని పౌరసరఫరాల శాఖ తెలిపింది. ప్రస్తుతం రాష్ట్రానికి ఏడాదికి 62,400 మెట్రిక్ టన్నుల కోటా ఉండగా ఇందుకు అదనంగా ఇస్తున్న రేషన్ కార్డులకు రాష్ట్ర ప్రభుత్వం ప్రతినెల14 కోట్ల రూపాయలు వెచ్చించాల్సి వస్తుందన్నారు.