డిమాండ్​కు అనుగుణంగా కొత్తకోర్సులు... సంప్రదాయ చదువులకు స్వస్తి!

మారుతున్న ఉద్యోగ, ఉపాధి అవకాశాలకు అనుగుణంగా ఉన్నత విద్యలో కొత్త కోర్సులు అందుబాటులోకి వచ్చాయి. డిమాండ్​కు తగినట్లు ఇంజినీరింగ్, డిగ్రీలో నూతన కోర్సులు ఈ ఏడాది ప్రవేశపెట్టారు. కొత్త కోర్సుల్లో చేరేందుకు విద్యార్థుల నుంచి ఊహించిన స్పందన వచ్చింది. మరో వైపు ఆదరణ కరవైన కొన్ని సంప్రదాయ కోర్సులను నిర్వహించేందుకు కళాశాలలు మొగ్గు చూపడం లేదు. ఈ ఏడాది కొన్ని కాలేజీలు సంప్రదాయ కోర్సులను ఉపసంహరించుకోగా.. వచ్చే ఏడాది అదే దిశలో వెళ్లేందుకు మరికొన్ని విద్యా సంస్థలు సిద్ధపడుతున్నాయి.

మారుతున్న కాలానికి అనుగుణంగా ఉన్నత విద్యామండలి కొత్త కోర్సులను ప్రవేశపెట్టింది. ఉద్యోగాలకు ఉన్నత విద్య ఉపయోగపడటం లేదని కొన్నేళ్లుగా విద్యార్థులు, తల్లిదండ్రుల్లో అసంతృప్తి నెలకొంది. మరోవైపు ఉద్యోగాలకు అవసరమైన నైపుణ్యం కాలేజీల నుంచి బయటకు వస్తున్న విద్యార్థుల్లో ఉండటం లేదన్న భావన పారిశ్రామిక వర్గాల్లో ఏర్పడింది. మార్కెట్ డిమాండ్​కు అనుగుణంగా ఉన్నత, సాంకేతిక విద్యలో మార్పులు అవసరమని కొంతకాలంగా విద్యా వేత్తలు, పారిశ్రామిక నిపుణులు నొక్కి చెప్తున్నారు. కొత్త కోర్సుల వైపు ఈ ఏడాది అడుగులు పడ్డాయి. ముఖ్యంగా ఇంజినీరింగ్​లో ఎక్కువగా కొత్త కోర్సులు అందుబాటులోకి వచ్చాయి.

సంప్రదాయ కోర్సులకు స్వస్తి

రాష్ట్రంలో ఇంజినీరింగ్​లో ఈ ఏడాది ఆరు కొత్త విభాగాల్లో సుమారు 18వేల సీట్లు అందుబాటులోకి వచ్చాయి. ఐటీ రంగంలో ఎక్కువ డిమాండ్ ఉన్న కృత్రిమ మేధ, మెషీన్ లెర్నింగ్, సైబర్ సెక్యూరిటీ, డేటా సైన్స్, ఇంటర్నెట్ ఆఫ్ థింగ్స్, బ్లాక్ చైన్ టెక్నాలజీ వంటి కోర్సులకు ఏఐసీటీఈ అనుమతిచ్చింది. బీటెక్​లో ఆర్టిఫిషియల్ ఇంటెలిజెన్స్, మెషిన్ లెర్నింగ్, డేటా సైన్స్ కోర్సులు ప్రవేశ పెట్టేందుకు ఎక్కువ కళాశాలలు మొగ్గు చూపాయి. కాలేజీలు అంచనా వేసినట్లుగా ఆ కోర్సుల్లో చేరేందుకు విద్యార్థుల నుంచి మంచి స్పందన కనిపించింది. మరోవైపు సివిల్, మెకానికల్, ఎలక్ట్రికల్ వంటి సంప్రదాయ కోర్సుల్లో కొన్నేళ్లుగా అధిక సంఖ్యలో సీట్లు మిగిలిపోతున్నాయి. సంప్రదాయ కోర్సుల్లోని సుమారు 13 వేల సీట్లను కళాశాలలు ఈ ఏడాది ఉపసంహరించుకున్నాయి. రాష్ట్రంలో ఈ ఏడాది కొత్తగా అందుబాటులోకి వచ్చిన ప్రైవేటు యూనివర్సిటీల్లోనూ నూతన కోర్సులకే ఎక్కువ డిమాండ్ నెలకొంది.

ప్రైవేటు ఐనా పర్వాలేదు

మహీంద్ర, మల్లారెడ్డి, అనురాగ్, ఎస్ఆర్, ఓక్సిన్ ప్రైవేట్ యూనివర్సిటీలూ ఈ ఏడాది బీటెక్​లో కృత్రిమ మేధ, మెషీన్ లెర్నింగ్, డేటా సైన్స్, ఐఓటీ, సైబర్ సెక్యూరిటీ, బ్లాక్ చైన్ వంటి కోర్సులను ప్రారంభించాయి. ప్రైవేటు యూనివర్సిటీల్లోనూ ఈ కొత్త కోర్సుల్లో విద్యార్థులు ఎక్కువగా చేరారు. ఈ ఏడాది ఐఐటీలూ కొత్త కోర్సుల బాటపట్టాయి. ఐఐటీ హైదరాబాద్​లో బయోమెడికల్ ఇంజినీరింగ్, బ్యాచిలర్ ఆఫ్ డిజైనింగ్, ఎంటెక్​లో ఈ-వేస్ట్ రీసోర్స్ వంటి కోర్సులు అందుబాటులోకి వచ్చాయి.

కొత్త కోర్సులకే గిరాకీ

రాష్ట్రంలో డిగ్రీలోనూ ఈ ఏడాది కొత్త కోర్సులను ప్రవేశ పెట్టారు. కొన్నేళ్లుగా రాష్ట్రంలో సంప్రదాయ కోర్సులైన బీఏ, బీఎస్సీ, బీకాంలలో సుమారు రెండు లక్షలకు పైగా సీట్లు మిగిలి పోతున్నాయి. ఆయా కోర్సులకు సరైన ఉద్యోగ, ఉపాధి అవకాశాలు ఉండవనే కారణంతో విద్యార్థులు చేరేందుకు ఆసక్తి కనబర్చడం లేదు. బీఎస్సీలో డేటా సైన్స్, బీకాంలో బిజినెస్ అనలిటిక్స్, బీఏలో ఆఫీస్ మేనేజ్​మెం​ట్ కోర్సులు కొత్తగా అందుబాటులోకి వచ్చాయి. వీటికి విద్యార్థుల నుంచి మంచి ఆదరణ లభించింది. ఇంటర్ ఒకేషినల్ విద్యార్థులను దృష్టిలో ఉంచుకొని ఈ ఏడాది డిగ్రీలో కొత్తగా ప్రవేశ పెట్టిన ఫిషరీస్, అగ్రికల్చరల్ ప్రొడక్షన్, డైరీ టెక్నాలజీ, ఫారెస్ట్రీ కోర్సులకు మంచి డిమాండ్ ఏర్పడింది.

వచ్చే ఏడాది మరిన్ని కోర్సులు

వచ్చే విద్యా సంవత్సరం కొత్త కోర్సుల్లో సీట్లు పెంచడంతో పాటు.. మరిన్ని నూతన కోర్సులను అందుబాటులోకి తెచ్చేందుకు అధికారులు కసరత్తు చేస్తున్నారు. కళాశాలలూ డిమాండ్ లేని సంప్రదాయ కోర్సులను వదిలేసి కొత్త కోర్సుల నిర్వహణకు సిద్ధపడుతున్నాయి.

ఇదీ చదవండి:సరికొత్త పంథాలో ఆర్టీసీ.. డ్రైవింగ్‌లో నిరుద్యోగ యువతకు శిక్షణ