పురపాలనపై చట్టం ఏం చెబుతోందంటే...?

పురపాలనలో మేయర్లు, ఛైర్​పర్సన్లు అత్యంత క్రియాశీలక పాత్ర పోషించనున్నారు. పట్టణాలకు సంబంధించిన అంశాలపై పూర్తి స్థాయిలో దృష్టిసారించాల్సి ఉంటుంది. బాధ్యతల్లో ఏ మాత్రం నిర్లక్ష్యంగా వ్యవహరించినా పదవులు కోల్పోయే ప్రమాదముంది. ఆ మేరకు పురపాలక  చట్టంలో ప్రత్యేక నిబంధనలు పొందుపరిచారు.

నగరపాలక సంస్థల పాలకమండళ్లకు మేయర్లు, పురపాలక సంస్థల పాలకమండళ్లకు ఛైర్‌పర్సన్లు నేతృత్వం వహిస్తారు. పాలకమండళ్ల సమావేశాలకు అధ్యక్ష్యత వహించనున్న మేయర్లు, ఛైర్‌ పర్సన్లు పురపాలనను సాఫీగా సాగించాల్సి ఉంటుంది. మేయర్లు, ఛైర్‌పర్సన్ల కర్తవ్యాలు, బాధ్యతలను పురపాలక చట్టంలో ప్రత్యేకంగా ప్రస్తావించారు.

చట్టంలో 23వ విభాగం ప్రకారం.. ప్రతి నెల ఒకసారి పాలకమండలిని సమావేశపరచాలి. కౌన్సిల్ సభ్యులంతా.. లేదా సగం మంది సభ్యులు లిఖితపూర్వకంగా కోరినప్పుడు పాలకమండలి భేటీ కావాలి. పట్టణంలో పారిశుద్ధ్యం, నీటి సరఫరాతో పాటు వీధి దీపాలు సరిగా నిర్వహించాలి. కలెక్టర్ నేతృత్వంలో జిల్లా స్థాయి కమిటీ నిర్ణయించిన మేరకు పట్టణంలో నర్సరీ ఏర్పాటు చేసి మొక్కలు పెంచాలి. పట్టణ పరిధిలో ఉన్న ప్రభుత్వ భూములు, ఖాళీ స్థలాలను పరిరక్షించాలి.

ఏటా పురపాలిక లెక్కల ముగింపు ఆడిటింగ్ చేపట్టాలి. పురపాలికకు సంబంధించిన ఆస్తులను ఆక్రమణకు గురికాకుండా చర్యలు తీసుకోవాలి. పాలకమండలి సమావేశంలో తీసుకున్న నిర్ణయాలపై 24 గంటల్లోగా ఛైర్‌పర్సన్లు సంతకం చేయాల్సి ఉంటుంది. కౌన్సిల్ మంజూరు లేని పనిని జిల్లా కలెక్టర్ అనుమతి తీసుకొనే చేయాల్సి ఉంటుంది.

ఇదీ చదవండిః బాలల సైన్స్​ కాంగ్రెస్​ పోటీల్లో సత్తాచాటిన పెద్దపల్లి విద్యార్థిని