కరోనా రెండోదశ విజృంభిస్తోన్న నేపథ్యంలో జ్వర బాధితులను గుర్తించేందుకు ప్రభుత్వం ఫీవర్ సర్వేకు శ్రీకారం చుట్టింది. ఇందులో భాగంగా వైద్య, జీహెచ్ఎంసీ బృందాలు జంట నగరాల్లో ఇంటింటికీ తిరుగుతూ జ్వరం సహా ఇతర వ్యాధి లక్షణాలున్న వారిని గుర్తిస్తున్నారు. ఈ క్రమంలోనే గత 15 రోజుల్లో గ్రేటర్ పరిధిలో 50 వేల మందికి పైగా కొవిడ్‌ లక్షణాలతో బాధపడుతున్నట్లు సర్వేలో తేలింది. ప్రభుత్వం నిర్వహిస్తోన్న కేంద్రాలు సహా ప్రైవేటులో నమోదవుతున్న నిర్ధారణ పరీక్షల సమాచారాన్ని వైద్యారోగ్యశాఖ ప్రత్యేక బులెటిన్‌ రూపంలో రోజూ వెల్లడిస్తోంది. అందులో వెల్లడైన పాజిటివ్‌ కేసుల సమాచారానికి అదనంగా ఈ 50 వేల మంది బాధితులు నమోదవడం ఆందోళన కలిగించే అంశమేనని నిపుణులు పేర్కొంటున్నారు.
ఈ క్రమంలోనే బల్దియా అదనపు బృందాలతో ఫీవర్ సర్వేను వేగవంతం చేసింది. మొదటగా 700 జీహెచ్ఎంసీ, వైద్య ఆరోగ్య శాఖలకు చెందిన బృందాలతో సర్వే చేయగా.. ఇటీవల ఆ సంఖ్య 1,543 బృందాలకు చేరింది. పండుగలు, ఆదివారాలు, ఇతర సెలవు దినాల్లోనూ సర్వే కొనసాగుతోంది. ఒక్కో బృందంలో ఒక ఏఎన్ఎం, ఆశా కార్యకర్త, జీహెచ్ఎంసీ వర్కర్‌తో కూడిన సభ్యులు ఇంటింటికీ తిరిగి సర్వే చేస్తున్నారు. ఆశా కార్యకర్తలు ఇప్పటి వరకు మొత్తం 6,96,366 మందిని సర్వే చేయగా.. అందులో 19,671 మంది కరోనా లక్షణాలతో ఉన్నట్లుగా గుర్తించారు. 317 బస్తీ దవాఖానాలు, అర్బన్ హెల్త్ సెంటర్లలో 1,97,037 ఫీవర్ సర్వేలు జరగగా.. అందులో 30,991 మందికి కరోనా లక్షణాలు ఉన్నట్లుగా తేలింది. మొత్తం జంట నగరాల పరిధిలో 8,93,403 మందికి ఫీవర్ సర్వే నిర్వహించగా.. అందులో 50,662 మందికి లక్షణాలు ఉన్నట్లుగా తేలింది. బాధితులందరికీ వెంటనే కరోనా కిట్లను అందించి.. హోం ఐసోలేషన్‌లో ఉండాలని అధికారులు సూచించారు.