పుణెకు 'మంకీపాక్స్'​ రోగి శాంపిల్స్​.. రేపు సాయంత్రానికి రిపోర్ట్స్​..!

monkeypox: మంకీపాక్స్​ గాలి ద్వారా సోకదని.. ప్రజలు ఎక్కువగా భయపడాల్సిన పని లేదని నల్లకుంట ఫీవర్​ ఆసుపత్రి సూపరింటెండెంట్​ డాక్టర్ శంకర్​ పేర్కొన్నారు. వైరస్​ లక్షణాలతో ఆసుపత్రిలో చేరిన రోగి పరిస్థితి ప్రస్తుతం నిలకడగానే ఉందన్నారు. బాధితుడి నుంచి శాంపిల్స్​ సేకరించి పుణెలోని ఎన్​ఐవీకి పంపామని.. రేపు సాయంత్రానికి రిపోర్ట్స్​ వచ్చే అవకాశం ఉందని వెల్లడించారు.

monkeypox: మంకీపాక్స్​ లక్షణాలతో హైదరాబాద్​లోని నల్లకుంట ఫీవర్​ ఆసుపత్రిలో చేరిన రోగి పరిస్థితి ప్రస్తుతం నిలకడగానే ఉందని ఆసుపత్రి సూపరింటెండెంట్​ డాక్టర్​ శంకర్​ వెల్లడించారు. చేతులు, కాళ్లు, ఛాతీపై దద్దుర్లు ఉన్నాయని.. నీరసం, కాస్త జ్వరం ఉందని తెలిపారు. అతని శరీరంపై ఉన్న దద్దుర్లు మంకీపాక్స్​లాగే ఉన్నాయన్న ఆయన.. వైరస్​ నిర్ధారణ కోసం రోగి నుంచి 5 రకాల శాంపిల్స్​ సేకరించినట్లు వివరించారు. వాటిని పుణెలోని నేషనల్‌ ఇన్‌స్టిట్యూట్ ఆఫ్‌ వైరాలజీ ల్యాబ్‌కు పంపనున్నట్లు చెప్పారు. రేపు సాయంత్రానికి బాధితుడి వైద్య పరీక్షల ఫలితాలు వచ్చే అవకాశం ఉందన్నారు.

ఈ సందర్భంగా వైరస్​కు ప్రజలు ఎక్కువగా భయపడాల్సిన పని లేదని సూపరింటెండెంట్​ పేర్కొన్నారు. రోగికి అతి దగ్గరగా ఉన్న వారికి, రోగి పెద్దగా దగ్గినప్పుడు వచ్చే తుంపర్ల ద్వారా మాత్రమే వ్యాధి సోకే అవకాశం ఉందన్నారు. గాలి ద్వారా మంకీపాక్స్​ సోకే అవకాశం లేదని స్పష్టం చేశారు. విదేశాల నుంచి వచ్చిన వారి శరీరంపై దద్దుర్లు, జ్వరం వంటి లక్షణాలు ఉంటే వెంటనే వైద్యులకు సమాచారం ఇవ్వాలని సూచించారు.

రోగి పరిస్థితి నార్మల్​గానే ఉంది. శరీరంపై ఉన్న దద్దుర్లు మంకీపాక్స్ లాగానే ఉన్నాయి. రోగి నుంచి 5 రకాల శాంపిల్స్​ సేకరించాం. వాటిని ఎన్.ఐ.వి. పుణెకి పంపిస్తాం. రేపు సాయంత్రానికి బాధితుడి వైద్య టెస్ట్​ల ఫలితాలు వచ్చే అవకాశం ఉంది. విదేశాల నుంచి వచ్చిన వారి శరీరంపై దద్దుర్లు, జ్వరం వంటి లక్షణాలు ఉంటే వెంటనే వైద్యులకు సమాచారం ఇవ్వాలి. మంకీపాక్స్​ గాలి ద్వారా సోకదు. ప్రజలు ఎక్కువ భయపడాల్సిన అవసరం లేదు. - డాక్టర్​ శంకర్​, నల్లకుంట ఫీవర్​ ఆసుపత్రి సూపరింటెండెంట్

కువైట్​ నుంచి వచ్చిన వ్యక్తిలో లక్షణాలు..:రాష్ట్రంలో మంకీపాక్స్‌ లక్షణాలున్న వ్యక్తిని వైద్య ఆరోగ్య శాఖ అధికారులు ఆదివారం గుర్తించారు. వెంటనే అప్రమత్తమై.. అతడిని హైదరాబాద్‌లోని ఫీవర్‌ ఆసుపత్రికి తరలించారు. కామారెడ్డి జిల్లా ఇందిరానగర్‌ కాలనీకి చెందిన 40 ఏళ్ల వ్యక్తికి మంకీ పాక్స్‌ లక్షణాలున్నట్లు బయటపడింది. ఈ నెల 6న అతడు కువైట్‌ నుంచి కామారెడ్డి వచ్చారు. 20న జ్వరం వచ్చింది. 23 నాటికి ఒళ్లంతా రాషెస్‌ రావడంతో మరుసటి రోజు కామారెడ్డిలోని ఓ ప్రైవేటు ఆసుపత్రికి వెళ్లారు. అక్కడి వైద్యులు మంకీపాక్స్‌ లక్షణాలున్నట్టు గుర్తించడంతో అక్కడి నుంచి 108 అంబులెన్స్‌లో ఆదివారం సాయంత్రం హైదరాబాద్‌లోని నల్లకుంట ఫీవర్‌ ఆసుపత్రికి తరలించారు. రోగితో కాంటాక్ట్‌ అయిన ఆరుగురిని గుర్తించి వారినీ ఐసోలేషన్‌ చేశారు.

ఇవీ చూడండి..