Congress vari deeksha: వరి దీక్షలో రైతుల కోసం 9 తీర్మానాలు..

ఇందిరా పార్కు వద్ద ధర్నా చౌక్‌లో... రెండో రోజు కాంగ్రెస్‌ వరి దీక్ష(Congress vari deeksha) కొనసాగుతోంది. వరి దీక్షకు మద్దతుగా తెజస అధ్యక్షుడు కోదండరామ్‌.. కాంగ్రెస్‌ నేతలతో కలిసి దీక్షలో పాల్గొన్నారు. రైతులకు మద్దతుగా పార్టీ నేతలు 9 తీర్మానాలు ప్రవేశ పెట్టారు. వీటిని ఏకగ్రీవంగా ఆమోదించారు.

Congress vari deeksha: హైదరాబాద్​ ఇందిరా పార్కు ధర్నా చౌక్​ వద్ద కాంగ్రెస్​ చేపడుతున్న వరి దీక్షలో.. రైతులకు మద్దతుగా 9 తీర్మానాలను ప్రవేశపెట్టారు. వీటిని పార్టీ నేతలు ఏకగ్రీవంగా ఆమోదించారు. కిసాన్ కాంగ్రెస్ నేతలు కోదండరెడ్డి, అన్వేష్ రెడ్డి తీర్మానాలను దీక్షలో ప్రవేశపెట్టారు. కొనుగోలు కేంద్రాల్లో మౌలిక సదుపాయాలు కల్పించి.. ప్రస్తుత ఖరీఫ్​ ధాన్యాన్ని వెంటనే కొనుగోలు చేసేలా ప్రభుత్వం చర్యలు చేపట్టాలని నేతలు తీర్మానించారు. కల్తీ విత్తనాల బారి నుంచి రైతులను కాపాడాలని.. పంట రుణ మాఫీ చేసి వారిని ఆదుకోవాలని డిమాండ్ చేశారు. మద్దతు ధరకు తక్కువ కాకుండా కొనుగోళ్లు చేయాలని తీర్మానంలో పేర్కొన్నారు.

కిసాన్​ కాంగ్రెస్​ ఆమోదించిన 9 తీర్మానాలు

• ప్రస్తుత ఖరీఫ్ వరి ధాన్యాన్ని తక్షణమే కొనుగొలు చేయాలి. కొనుగోలు కేంద్రాల్లో మౌలిక సదుపాయాలు కల్పించాలి.
• తడిసిన ధాన్యాన్ని కూడా ఎలాంటి ఆంక్షలు లేకుండా కొనుగోలు చేయాలి.
• ధాన్యం కొనుగోలు వ్యవస్థలో రైస్ మిల్లర్ల ప్రమేయం ఉండకూడదు.
• గతేడాది రబీ పంట సేకరణలో జరిగిన అవకతవకల వల్ల రైతుకు భారీగా జరిగిన ఆర్థిక నష్టాల మీద సిట్టింగ్ జడ్జి చేత విచారణ జరిపించాలి.
• యాసంగి పంటల సాగు విషయంలో ఆంక్షలు పెట్టకూడదు. భూమి స్వభావం, వనరుల అనుకూలతను బట్టి రైతుకు సాగుపై స్వేచ్ఛ ఉండాలి.
• మద్దతు ధరల పరిధిలో ఉన్న ప్రధానమైన పంటలను మద్దతు ధరకు తక్కువ కాకుండా కొనుగోలు చేయాలి.
• వ్యవసాయ పంటలకు సమగ్ర మద్దతు ధర, కొనుగోలు విషయంలో చట్ట బద్ధత కల్పించాలి.
• సమగ్రమైన విత్తన చట్టాన్ని తెచ్చి కల్తీ విత్తనాల బారి నుంచి రైతును కాపాడాలి.
• ఏకకాలంలో రూ. లక్ష పంట రుణమాఫీ చేయాలి. ప్రకృతి వైపరీత్యాల వల్ల జరిగిన పంట నష్టం 2020, 21 సంవత్సరాలకు కోర్టు ఆదేశాల ప్రకారం పంట నష్ట పరిహారం వెంటనే రైతులకు చెల్లించాలి.

కమీషన్ల కోసమే

కేంద్ర, రాష్ట్ర ప్రభుత్వాలు కుమ్మక్కై రైతులను వరి పండించవద్దంటున్నాయని..కాంగ్రెస్ ఎమ్మెల్యే సీతక్క ఆగ్రహం వ్యక్తం చేశారు. వరి పండే ప్రాంతాల్లో ఇతర పంటలు ఎలా పండుతాయని ప్రశ్నించారు. సాగు చట్టాలకు వ్యతిరేకంగా రైతులు చేపట్టిన ఉద్యమంలో వందల మంది అన్నదాతలు చనిపోయినా.. చివరికి గెలిచింది రైతులేనని సీతక్క(Mulugu mla seethakka in vari deeksha) అన్నారు. రైతుల పోరాటానికి సీఎం కేసీఆర్​ ఒక్క రోజు కూడా మద్దతివ్వలేదని మండిపడ్డారు. కార్పొరేట్‌ కంపెనీలు, కమీషన్ల కోసమే... కేంద్ర, రాష్ట్ర ప్రభుత్వాలు రైతులను ఇబ్బందులను గురిచేస్తున్నాయని సీతక్క ఆగ్రహం వ్యక్తం చేశారు.

ఇతర రాష్ట్రాల్లో రైతు చట్టాలకు వ్యతిరేకంగా తీర్మానం పెడితే తెలంగాణలో కేసీఆర్​ పట్టించుకోలేదు. కేంద్ర మంత్రి అజయ్ మిశ్రా కుమారుడు రైతులను తొక్కించి చంపితే కనీసం అసెంబ్లీలో సంతాపం తెలపలేదు. అక్కడ ఎన్నికలు ఉన్నాయనే చట్టాలు రద్దుచేస్తున్నట్లు నాటకాలు చేస్తున్నారు.. కానీ ఇక్కడ వడ్లు కొనడం లేదు. రైతు పరిహారం లేదు. పంట నష్టపోయి ఇబ్బందులు పడుతున్నా వారిని ఆదుకునేది లేదు. రాహుల్ గాంధీ చట్టాలను వెనక్కి తీసుకోక తప్పదు అని గతంలో చెప్పారు.. ఇప్పుడు అలాగే జరిగింది. కార్పొరేట్‌ కంపెనీలు, కమీషన్ల కోసమే... కేంద్ర, రాష్ట్ర ప్రభుత్వాలు రైతులను ఇబ్బందులను గురిచేస్తున్నాయి. -సీతక్క, ములుగు ఎమ్మెల్యే

ప్రణాళిక ఎందుకు వేసుకోలేదు.?

దీక్షకు సంఘీభావం తెలిపిన తెలంగాణ జనసమితి అధ్యక్షుడు కోదండరాం (kodanda ram in vari deeksha) ముఖ్యమంత్రి కేసీఆర్​పై తీవ్ర వ్యాఖ్యలు చేశారు. ప్రభుత్వమే చీడపీడగా రైతుపై దాడి చేస్తే... ఏం చేయాలో అర్థంకాని పరిస్థితి రాష్ట్రంలో నెలకొందని ఆందోళన వ్యక్తం చేశారు. చేనుకు చీడ పడితే ఏం చేయాలో రైతుకు తెలుసన్నారు. ధాన్యం వస్తుందని తెలిసినప్పుడు... ప్రభుత్వం ఎందుకు ప్రణాళిక వేసుకోలేదని ఆయన ప్రశ్నించారు. దిల్లీకి వెళ్లి తేల్చుకుని వస్తానన్న కేసీఆర్... ఫామ్‌హౌజ్‌లో నిద్రపోతున్నారని దుయ్యబట్టారు. దిల్లీకి వెళ్లి వచ్చాక అక్కడ ఏం జరిగిందో ఎందుకు చెప్పడంలేదని నిలదీశారు.

రైతు ఆత్మగౌరవాన్ని తాకట్టు పెట్టేందుకు కేసీఆర్​ యత్నిస్తున్నారు. కల్లాల్లో ఎలాంటి వసతులు లేవు. ఇసుక లారీలను పదిరోజులు ఆపితే వరి ధాన్యం రవాణా చేయొచ్చు. ఖరీఫ్​తో పాటు యాసంగి పంట కూడా కొనాలి. రైతుల కోసం ఎక్కడికైనా వెళ్లి పోరాడతాం. -కోదండ రాం, తెజస అధ్యక్షుడు

ఇదీ చదవండి:Telangana Cabinet Meeting: రేపు మధ్యాహ్నం మంత్రివర్గ సమావేశం.. ధాన్యం కొనుగోలే కీలకాంశం