అసెంబ్లీలో తాను చేసిన సూచనకు మంత్రి కేటీఆర్ స్పందించడం పట్ల కృతజ్ఞతలు తెలియజేస్తున్నట్లు సంగారెడ్డి ఎమ్మెల్యే జగ్గారెడ్డి చెప్పారు. ఎల్‌ఆర్‌ఎస్‌ ఉచితంగా చేయాలని, అలా కుదరని పక్షంలో నామమాత్రపు రుసుం వసూలు చేయాలని తాను అసెంబ్లీలో ప్రభుత్వానికి విజ్ఞప్తి చేసినట్లు వివరించారు. ప్రస్తుత ఆర్థిక పరిస్థితులను దృష్టిలో ఉంచుకుని ఏడాది పాటు సమయం ఇవ్వాలని కోరారు. ప్రభుత్వం వసూలు చేసే మొత్తాన్ని కొంత తగ్గిస్తే ప్రజలు సంతోషిస్తారని అభిప్రాయపడ్డారు.
నిలిపివేసిన రిజిస్ట్రేషన్లను తక్షణమే తిరిగి ప్రారంభించాలని కోరారు. జీహెచ్ఎంసీ ఎన్నికల్లో పోటీ చేసేందుకు కాంగ్రెస్‌కు అభ్యర్థులే దొరకరని మంత్రి శ్రీనివాసయాదవ్‌ చేసిన వ్యాఖ్యలపై జగ్గారెడ్డి తీవ్రంగా స్పందించారు. ఇప్పుడున్న కార్పొరేటర్లలో 80 శాతం కాంగ్రెస్‌ పార్టీవారేనన్న ఆయన అధికారంలో ఎవరు ఉంటే.. ఆ పార్టీ మేయర్ జీహెచ్ఎంసీలో ఉంటారన్నారు.