KTR: 'అంబేడ్కర్​ ఆశయాల దిశగా తెరాస పాలన'

రాష్ట్ర ప్రభుత్వం ప్రతిష్ఠాత్మకంగా చేపట్టిన దళిత బంధు పథకం.. ఈరోజు హుజూరాబాద్​ నియోజకవర్గంలో ప్రయోగాత్మకంగా ప్రారంభం కానుంది. ఈ పథకం పట్ల హర్షం వ్యక్తం చేస్తూ మంత్రులు కేటీఆర్​, హరీశ్​ రావు ట్వీట్​ చేశారు. అంబేడ్కర్​ ఆశయాలకనుగుణంగా రాష్ట్ర ప్రభుత్వం పనిచేస్తుందని ట్విట్టర్​లో పేర్కొన్నారు.

రాజ్యాంగ నిర్మాత డాక్టర్ బీఆర్ అంబేడ్కర్ ఆశయాలు తెలంగాణ రాష్ట్రంలో సాకారం అవుతున్నాయని మంత్రి కేటీఆర్ హర్షం వ్యక్తం చేశారు. 20వ శతాబ్దంలో దళితులకు సామాజిక న్యాయం దొరికితే.. 21వ శతాబ్దంలో ఆర్థిక సాధికారతతో దళితులు అభివృద్ధి వైపు అడుగులు వేస్తున్నారని పేర్కొన్నారు. దళితుల అభ్యున్నతి కోసం ముఖ్యమంత్రి కేసీఆర్ ఎంతో కృషి చేస్తున్నారని కేటీఆర్ అన్నారు. దళిత బంధు పథకాన్ని ప్రవేశపెట్టి మార్గదర్శకంగా నిలిచారని కొనియాడారు. ఈ సందర్భంగా కేసీఆర్​కు ప్రత్యేక కృతజ్ఞతలు తెలుపుతూ కేటీఆర్​ ట్వీట్ చేశారు.

అదేవిధంగా ఆర్థిక మంత్రి హరీశ్ రావు.. దళితబంధు పథకం ప్రారంభం కావడం పట్ల హర్షం వ్యక్తం చేస్తూ ట్వీట్ చేశారు. దళిత కుటుంబాల సంక్షేమం కోసం ప్రభుత్వం రూ. 10 లక్షలు కేటాయించడం.. వారి అభ్యున్నతికి ఎంతగానో దోహదపడుతుందని స్పష్టం చేశారు.

కరీంనగర్​ జిల్లా హుజూరాబాద్​ మండలం శాలపల్లి శివారులో ఈ రోజు దళిత బంధు​ భారీ బహిరంగ సభ జరగనుంది. ప్రతిష్ఠాత్మక పథకం దళితబంధును నియోజకవర్గంలో అమలు చేయనున్నారు. అర్హులకు సీఎం కేసీఆర్​ చేతుల మీదుగా దళితబంధు చెక్కులను అందజేయనున్నారు. మొదటి రోజు 2000 మందికి చెక్కుల పంపిణీ చేయనుండగా.. రేపటి నుంచి నియోజకవర్గ వ్యాప్తంగా 20వేల దళిత కుటుంబాలకు చెక్కులు అందించనున్నారు.

ఇదీ చదవండి:Dalitha Bandhu: 'కుంభవృష్టి పడినా శాలపల్లిలో దళితబంధు సభ జరుగుతుంది'