గీత వృత్తికి సంబంధం లేని వారు... గీత వృత్తితో భాగస్వామ్యం లేనివారు కాంట్రాక్టర్లుగా చెలామణి అవుతున్న వ్యక్తులపై కఠిన చర్యలు తీసుకోవాలని అధికారులను మంత్రి శ్రీనివాస్ గౌడ్ ఆదేశించారు. హైదరాబాద్‌ రవీంద్రభారతిలోని ఆయన కార్యాలయంలో ఉన్నతాధికారులతో సమీక్షించారు. గీత కార్మికుల సంక్షేమం, అభివృద్ధి కోసం రాష్ట్ర ప్రభుత్వం తీసుకుంటున్న చర్యలను అధికారులకు వివరించారు. ప్రమాదవశాత్తు మరణించిన, శాశ్వత అంగవైకల్యం చెందిన గీత కార్మికులకు ఇచ్చే పరిహారం రూ.2 లక్షల నుంచి రూ.5 లక్షలకు పెంచామన్నారు.
మూడు నెలల్లో నీరా కేఫ్
పరిహారాన్ని రైతు బీమా మాదిరిగా వెంటనే అందే విధంగా చర్యలు తీసుకోవాలన్నారు. సొసైటీ సభ్యులకు, టీఎఫ్టీ లైసెన్సుదారులకు గుర్తింపు కార్డులను వెంటనే జారీ చేయాలని సూచించారు. అనుమతి లేకుండా తాటి, ఈత చెట్లను అక్రమంగా నరికివేసే వారిపై నాన్ బెయిలబుల్ కేసులు నమోదు చేయాలని తెలిపారు. అర్హులైన గీత కార్మికులకు ఎటువంటి అభ్యంతరాలు లేకుండా పింఛన్లు అందించాలన్నారు. ట్యాంక్ బండ్పై నిర్మిస్తున్న నీరా కేఫ్, నందనంలో నీరా, దాని ఉప ఉత్పత్తుల తయారీ కేంద్రాల నిర్మాణ పనులను మూడు నెలల్లో పూర్తి చేయాలని ఆదేశించారు.