పని బాగా చేయాలంటే ఆరోగ్యం ఎంతో ముఖ్యం: శ్రీనివాస్ గౌడ్ ఆరోగ్యంగా ఉండాలంటే ప్రతి ఒక్కరూ క్రీడల్లో పాల్గొనాలని క్రీడా శాఖ మంత్రి శ్రీనివాస్ గౌడ్ పేర్కొన్నారు. సికింద్రాబాద్లోని జింఖానా గ్రౌండ్లో టీఎన్జీవోల క్రికెట్ టోర్నమెంట్ను మంత్రి ప్రారంభించారు. ప్రతి సంవత్సరం టీఎన్జీవోలు నిర్వహిస్తున్న ఈ టోర్నీలో శ్రీనివాస్ గౌడ్ క్రికెట్ ఆడుతూ సందడి చేశారు.
తెలంగాణ ఉద్యమంలో ఉద్యోగులు అంతా చురుగ్గా పాల్గొన్నారని.. అదేవిధంగా వారు అన్ని రంగాల్లో కూడా తమ సత్తా చాటుతున్నారు మంత్రి శ్రీనివాస్ గౌడ్ అన్నారు. ప్రతినిత్యం ఉద్యోగం చేయడంలో ఒత్తిడికి గురైన ఉద్యోగులు మానసిక శారీరక వికాసాలను అందించేందుకు ఈ టోర్నీ ఎంతగానో ఉపయోగపడుతుందన్నారు. పని బాగా చేయాలంటే ఆరోగ్యం ఎంతో ముఖ్యమని తెలిపారు.
క్రీడల పట్ల ఆసక్తిని పెంచడంలో రాష్ట్ర ప్రభుత్వం ఎంతగానో కృషి చేస్తుందని.. దాదాపు 40 స్టేడియంలను కూడా నిర్మించనున్నట్లు ఆయన వెల్లడించారు. జాతీయ స్థాయిలో తెలంగాణ క్రీడాకారులు సత్తా చాటుతున్నారన్నారు. గురుకులాల్లో కూడా విద్యతో పాటు క్రీడా రంగంలో విద్యార్థులకు ప్రోత్సాహాన్ని అందిస్తున్నట్లు మంత్రి తెలిపారు.
ఇవీ చూడండి: రక్షణ రంగానికి హైదరాబాద్ చక్కటి వేదిక: కేటీఆర్
