రాష్ట్రంలో పాఠశాలలు పునఃప్రారంభిస్తున్నందున గురుకుల, ఆశ్రమ పాఠశాలలను పూర్తిస్థాయిలో సిద్ధం చేయాలని మంత్రి సత్యవతి రాఠోడ్ అధికారులకు సూచించారు. విద్యార్థులందరినీ చేర్పించే బాధ్యత ఉపాధ్యాయులు తీసుకోవాలని తెలిపారు. పక్షం రోజుల పాటు గిరిదర్శిని కార్యక్రమంలో భాగంగా తండాలు, గూడేల్లోని ప్రతి ఇంటికీ వెళ్లి విద్యార్థుల నమోదు చేపట్టాలని తెలిపారు. ఏ ఒక్కరూ పాఠశాలలో చేరకుండా ఉండొద్దని తెలిపారు. తల్లిదండ్రులకు, విద్యార్థులకు కౌన్సిలింగ్ ఇచ్చి సెప్టెంబర్లో పాఠశాలలకు పంపేలా చూడాలని అన్నారు. గ్రామాల్లో ఉన్న అంగన్వాడీ ఉద్యోగుల సేవలను ఇందుకోసం వినియోగించుకోవాలని, ప్రతి విద్యార్థి పాఠశాలకు వచ్చేలా అంగన్వాడీలతో సమన్వయం చేసుకోవాలని చెప్పారు.
మరమ్మతులు చేపట్టండి
కొవిడ్ కారణంగా మూతపడ్డ విద్యాసంస్థల్లో తాగునీరు, విద్యుత్, మరుగుదొడ్ల వంటి కనీస వసతులు కల్పించి, కావల్సిన మరమ్మతులను వెంటనే చేపట్టాలని మంత్రి తెలిపారు. ఇందుకోసం పాఠశాలల ప్రధానోపాధ్యాయులు, హాస్టల్ వార్డెన్లకు 20వేల రూపాయల చొప్పున విడుదల చేయాలని ఆదేశించారు. ఆహార పదార్థాలు, కాస్మొటిక్స్ కొరత లేకుండా గిరిజన కో ఆపరేటివ్ కార్పోరేషన్ - జీసీసీ ద్వారా సమన్వయం చేయాలని చెప్పారు. విద్యార్థుల ఆరోగ్య పరిరక్షణ, అత్యవసర సేవల కోసం 24 గంటల పాటు నడిచేలా హెల్త్ కమాండ్ సెంటర్ నిర్వహించాలని సత్యవతి రాఠోడ్ తెలిపారు.