టికెట్​​యేతర ఆదాయ వనరులపై ఆర్టీసీ దృష్టి

ఆర్టీసీ టికెట్​​యేతర ఆదాయ వనరులపై దృష్టి సారించింది. ఇప్పటికే కార్గో, పార్శిల్​ సర్వీసులను అందుబాటులోకి తీసుకొచ్చిన ఆర్టీసీ... ఇప్పుడు మరో ఆదాయ మార్గాన్ని ఎంచుకుంది. ఆర్టీసీ ద్వారా రిటైల్​ ఇంధన అమ్మకాలను రాష్ట్ర రవాణా శాఖ మంత్రి పువ్వాడ అజయ్ కుమార్ ఖైరతాబాద్ రవాణాశాఖ కార్యాలయంలో ఆన్​లైన్ ద్వారా ప్రారంభించారు.

ఆర్టీసీ ఆదాయాన్ని పెంచే దిశలో భాగంగా ప్రథమంగా గురువారం ఖైరతాబాద్ రవాణాశాఖ కార్యాలయంలో అవుట్​లెట్ (పెట్రోల్ బంకు)ను మంత్రి పువ్వాడ ప్రారంభించారు. సంస్థ ఆర్థిక పరిపుష్ఠికై రిటైల్ ఇంధన వ్యాపారాన్ని ఆర్టీసీ చేపట్టిందని ఆయన తెలిపారు.

ఆగష్టు నాటికి పూర్తి స్థాయిలో

హన్మకొండ, మహబూబాబాద్, బిచ్కుంద, బీర్కూర్, ఆసిఫాబాద్​లలో మొత్తం 5 అవుట్​లెట్లను ఆగష్టు నాటికి పూర్తి స్థాయిలో అమలులోకి తీసుకొస్తామని చెప్పారు. టీఎస్​ఆర్టీసీ, హెచ్​పీసీఎల్, ఐఓసీఎల్ భాగస్వామ్యంతో ఇంధనం అమ్మకాల వ్యాపారాన్ని ప్రత్యక్షంగా నిర్వహించడానికి ఎంఓయూ ఒప్పందం చేసుకుందని వివరించారు.

రిటైల్ ఇంధన కార్యకలాపాలను టీఎస్ఆర్టీసీ స్వయంగా నిర్వహించడం వల్ల రిటైల్ ఇంధన కార్యకలాపాల నిర్వహణతో ఆర్టీసీకి సుమారు నెలకు రూ.20.65 లక్షల అదనపు ఆదాయాన్ని సమకూర్చుకోవచ్చని ఆయన పేర్కొన్నారు.

వివరాలిలా...

హెచ్​పీసీయల్, ఐఓసీయల్ ద్వారా స్థాపించబడనున్న 92 పెట్రోల్ బంకుల నిర్వహణ కోసం... గ్రేటర్ హైదరాబాద్ జోన్, హైదరాబాద్ జోన్, కరీంనగర్ జోన్లకు ఓపెన్ టెండర్ల ద్వారా సర్వీసు ప్రొవైడర్లను కార్పొరేషన్ నియమించిందన్నారు. చమురు కంపెనీలు పెట్రోల్​పై లీటరుకు రూ. 2.83పైసలు, హెచ్​ఎస్​డీ ఆయిల్​పై లీటర్​కు రూ.1.89పైసలు డీలర్​కు కమీషన్​గా చెల్లిస్తారు.

ఆర్టీసి పెట్రోల్ బంకులు నిర్వహించడం ద్వారా ప్రజలకు నాణ్యమైన చమురు లభిస్తుందని అధికారులు హామీనిస్తున్నారు. దాని వల్ల ఇంజిన్ జీవితకాలం పెరగడంతో పాటు ఎక్కువ మైలేజ్ పొందడం వంటి ప్రయోజనాలు సమకూరుతాయని రవాణా శాఖ మంత్రి తెలిపారు. ప్రజలు ఈ సదుపాయాలను సద్వినియోగం చేసుకోవాలన్నారు.

ఇదీ చూడండి : ఎమ్మెల్యే మృతికి కేసీఆర్, పోచారంతోపాటు మంత్రుల సంతాపం