Minister Niranjan Reddy counter attack On Congress :కాంగ్రెస్ పార్టీ నేతలు నోటి కొచ్చినట్లు మాట్లాడడం మానేసి.. తమ పాలనలో పాలమూరు జిల్లాలో జరిగిన అన్యాయానికి అక్కడి ప్రజలకు క్షమాపణలు చెప్పాలని వ్యవసాయ శాఖ మంత్రి నిరంజన్ రెడ్డి అన్నారు. జడ్చర్ల బహిరంగ సభలో కాంగ్రెస్ నాయకులు రాష్ట్ర ప్రభుత్వం చేసిన విమర్శలపై మంత్రి తీవ్రస్థాయిలో మండిపడ్డారు. నాలుగున్నర దశాబ్దాల కాంగ్రెస్ పాలన పాపమే.. పాలమూరు వలసలు, ఆకలి చావులు, ఆత్మహత్యలు అని ఆక్షేపించారు. మరి ఇప్పుడు ఆ పార్టీ నేతలు ఏం ముఖం పెట్టుకొని అక్కడి ప్రజలను ఓట్లు అడుగుతారని ప్రశ్నించారు.
కర్ణాటక ఫలితాలు ఇక్కడా వస్తాయంటే.. ఎలా : నాలుగున్నరేళ్ల కేసీఆర్ అభివృద్ధి పరమైన పాలనను చూసి.. 2018లో ఉమ్మడి పాలమూరు ప్రజలు 14 స్థానాలకు 13 స్థానాలు కట్టబెట్టారని మంత్రి నిరంజన్ రెడ్డి గుర్తు చేశారు. ఇప్పటికీ కాంగ్రెస్ పార్టీకి ఈ జిల్లాలో స్థానం లేదని అన్నారు. మరో ఆరు నెలల్లో వచ్చే ఎన్నికల్లోనూ.. తెలంగాణ ప్రజలు బీఆర్ఎస్ పార్టీకే పట్టం కట్టేందుకు సిద్ధంగా ఉన్నారని తెలిపారు. పాదయాత్ర చేస్తున్న కాంగ్రెస్ నాయకులకు ఆ యాత్రలో రహదారుల వెంట.. ఊళ్లలో ఎక్కడా.. కేసీఆర్ చేసిన అభివృద్ధి కనిపించలేదా అని ప్రశ్నించారు. కర్ణాటక ఫలితాలను చూసి కాంగ్రెస్ నేతలు పగటి కలలు కంటున్నారని.. ఆ రాష్ట్రంలో ప్రత్యామ్నాయం లేకే ప్రజలు కాంగ్రెస్ పార్టీకి అధికారాన్ని అప్పగించారని చెప్పారు
"రాష్ట్రంలో కాంగ్రెస్ పార్టీ చేసే పాదయాత్రలను ప్రజలు.. నాయకత్వం కోసం చేసే పాదయాత్రలుగా గుర్తిస్తున్నారు. కాంగ్రెస్ పార్టీ మాటలు ఆశ్చర్యంగా ఉన్నాయి. పాలమూరు జిల్లానే కాదు.. తెలంగాణ మొత్తం ప్రాంతాన్ని ఐదు దశాబ్దాలు అధికారంలో ఉండి జిల్లా వెనుకబాటుకు, తెలంగాణ వెనుకబాటుకు కారణమయ్యారు. తెలంగాణ సమాజం కాంగ్రెస్ పార్టీని క్షమించదు. పాలమూరు రంగారెడ్డి ప్రాజెక్టును ముందుకు కదలకుండా అడ్డుకట్ట వేసిందే కాంగ్రెస్. కోర్టుల్లో కేసులు వేసి ప్రాజెక్టును అడ్డుకున్నారు." - నిరంజన్ రెడ్డి, వ్యవసాయ శాఖ మంత్రి
కాంగ్రెస్ పార్టీ నిర్లక్ష్య శాపమే.. పాలమూరు వెనుకబాటు : కాంగ్రెస్ పార్టీలో అందరూ కట్టప్పలేనని.. పాలమూరు ప్రాజెక్టులు నిర్లక్ష్యం చేసి, పోతిరెడ్డిపాడుతో వెన్నుపోటు పొడిచి, పాలమూరు ప్రజలను వలసలు, ఆకలిచావులు, ఆత్మహత్యల పాలు చేశారని నిరంజన్ రెడ్డి ధ్వజమెత్తారు. అధికారంపై కాంగ్రెస్ దింపుడుకళ్లెం ఆశతో ఉందని.. ఈసారి ఎన్నికల తర్వాత రాష్ట్రంలో కాంగ్రెస్ పార్టీ పరిస్థితి తమిళనాడు, ఆంధ్రప్రదేశ్ మాదిరే అవుతుందని ఎద్దేవా చేశారు. త్వరలో పాలమూరు - రంగారెడ్డి ప్రాజెక్టు పూర్తి చేసి ఉమ్మడి జిల్లాను సస్యశ్యామలం చేస్తామని మంత్రి హామీ ఇచ్చారు. తెలంగాణ ప్రజలకు సీఎం కేసీఆర్.. నీరు, ఉపాధి అవకాశాలు అన్నీ ఇచ్చారని వివరించారు. కేసీఆర్ రాకతో పల్లెలు, పట్టణాలు బాగుపడ్డాయని.. దేశంలో నంబర్ 1 రాష్ట్రంగా తెలంగాణ కొనసాగుతోందని మంత్రి నిరంజన్ రెడ్డి అన్నారు.
ఇవీ చదవండి :
