వరద ప్రాంతాల్లో మూడో రోజు మంత్రి కేటీఆర్ పర్యటన

హైదరాబాద్ లోని వరద ప్రభావిత ప్రాంతాల్లో పురపాలక మంత్రి కేటీఆర్... మూడో రోజు పర్యటించారు. జీహెచ్ఎంసీ ఆద్వర్యంలో ఏర్పాటు చేసిన కేంద్రాలను సందర్శించి సౌకర్యాలపై బాధితులను అడిగి తెలుసుకున్నారు. వరద బాధితులకు రేషన్ కిట్లను అందించారు. ఎలాంటి ఆరోగ్య సమస్యలు తలెత్తకుండా తగిన జాగ్రత్తలు తీసుకోవాలని మంత్రి సూచించారు.

హైదరాబాద్​లో వర్ష ప్రభావిత కాలనీలను పురపాలక శాఖ మంత్రి కేటీఆర్... మూడో రోజు పరిశీలించారు. ఖైరతాబాద్ లోని బీఎస్ మక్త కాలనీలో జీహెచ్ఎంసీ ఏర్పాటు చేసిన షెల్టర్ హోమ్ ని పరిశీలించి, అక్కడ అందిస్తున్న సౌకర్యాలపైన మంత్రి కేటీఆర్ ఆరా తీశారు. స్థానిక ఎమ్మెల్యే దానం నాగేందర్​తో పాటు హైదరాబాద్ జిల్లా కలెక్టర్ శ్వేతా మహంతి, జీహెచ్ఎంసీ జోనల్ కమిషనర్, ఇతర ఉన్నతాధికారులతో కలిసి మంత్రి కేటీఆర్ పర్యటించారు.

జీహెచ్ఎంసీ ప్రయత్నం...

వరద వల్ల ఇబ్బందులు పడుతున్న ప్రజలకు రేషన్ కిట్​లతో పాటు ఇతర అన్ని సౌకర్యాలను అందించేందుకు జీహెచ్ఎంసీ ప్రయత్నం చేస్తోందని కేటీఆర్ తెలిపారు. ప్రస్తుతం వర్షాలు తగ్గుముఖం పట్టగా కాలనీలు వరద నుంచి తెేరుకుంటున్న తరుణంలో పారిశుద్ధ్యానికి ప్రాధాన్యత ఇస్తున్నామని తెలిపిన కేటీఆర్ ప్రజలంతా కచ్చితంగా తాగునీటి విషయంలో జాగ్రత్తగా ఉండాలని, కాచివడ పోసిన నీటిని తాగాలన్నారు.

భరోసా...

వరద ప్రభావిత కాలనీలలో ప్రత్యేకంగా పారిశుద్ధ్య కార్యక్రమాలు చేపడతామని, ప్రజలకు అవసరమైన వైద్య సదుపాయాన్ని అందిస్తామని హామీ ఇచ్చారు. ప్రస్తుతం షెల్టర్ హోమ్​లలో ఉన్న వారందరికీ ఇప్పటికే ఆహారంతో పాటు దుప్పట్లు, మందులు అందిస్తున్నామని తెలిపారు. బీఎస్ మక్తలో ఏర్పాటు చేసిన షెల్టర్ హోమ్, వైద్య శిబిరాన్ని, అక్కడ అందుతున్న సేవలను పరిశీలించారు. షెల్టర్ హోమ్​లో ప్రస్తుతం బస చేసిన ప్రజలతో మంత్రి మాట్లాడి వారికి భరోసా ఇచ్చారు.

ప్రాధాన్యత...

ఇళ్లలో నుంచి పూర్తిగా వరద నీళ్లు తగ్గేవరకు షెల్టర్ హోమ్​లో ఉండొచ్చని, ఇందుకోసం అవసరమైన అన్ని సదుపాయాలను ప్రభుత్వం కల్పిస్తుందని తెలిపారు. షెల్టర్ హోమ్ నుంచి ఇళ్లకు వెళ్లిన తర్వాత పారిశుద్ధ్యానికి ప్రాధాన్యత ఇవ్వాలని, ఈ విషయంలో అవసరమైతే జీహెచ్ఎంసీ సహాయం తీసుకోవాలని సూచించారు.

పరిశీలన...

బేగంపేట, ప్రకాశ్ నగర్​లో పర్యటించి నీటమునిగిన కాలనీలను పరిశీలించిన మంత్రి కేటీఆర్, నగరంలో కురిసిన వర్షాలకు ఇబ్బందులు ఎదుర్కొంటున్న ప్రజలకు ముఖ్యమంత్రి సహాయ నిధి ద్వారా అందిస్తున్న రేషన్ కిట్లను పలువురికి అందించారు. బేగంపేటలో ప్రకాశ్ నగర్, బ్రాహ్మణ వాడి ప్రాంతాలను పరిశీలించిన అనంతరం అక్కడ ముంపుకు గురై ఇబ్బందులు ఎదుర్కొంటున్న కాలనీవాసులతో మాట్లాడారు. కాలనీ వాసులు పలు సమస్యలను మంత్రి దృష్టికి తేగా వాటిని వెంటనే పరిష్కరిచాలని ఆదేశించారు.

ముంపు ప్రాంతాల్లో..

మల్కాజిగిరిలోని పటేల్ నగర్​కి వెళ్లిన మంత్రి కేటీఆర్... అక్కడ ముంపునకు గురైన ప్రాంతాలను పరిశీలించారు. స్థానిక ఎమ్మెల్యే మైనంపల్లి హనుమంతరావు, మంత్రి కేటీఆర్​కి ముంపునకు గురైన ప్రాంతాలను చూపించారు. మూడు రోజులుగా ఆయా కాలనీల్లో అందిస్తున్న సహాయక చర్యల గురించి వివరాలు అందజేశారు.

ఆదుకుంటాం...

పటేల్ నగర్ వద్ద ఉన్న నాలాను పరిశీలించిన మంత్రి, భవిష్యత్తులో వరద రాకుండా చేపట్టాల్సిన రిటైనింగ్ వాల్ వంటి నిర్మాణాలకు సంబంధించి అంచనాలు సిద్ధం చేసి వెంటనే అనుమతులు తీసుకోవాలని అధికారులకు ఆదేశాలు జారీ చేశారు. వర్షాల వల్ల ఇళ్లు కోల్పోయిన లేదా నష్టపోయిన వారికి ప్రభుత్వం ఆదుకుంటుందని మంత్రి కేటీఆర్ భరోసా ఇచ్చారు.

ఇవీ చూడండి: జీహెచ్ఎంసీ, నాలా చట్ట సవరణలకు గవర్నర్ ఆమోదం