మోదీజీ థ్యాంక్స్.. ఈడీ చీఫ్​గా బండిని నియమించినందుకు..: కేటీఆర్

కేంద్రంపై మంత్రి కేటీఆర్ మరోసారి వ్యంగ్యాస్త్రాలు వదిలారు. 'దేశంలో డబుల్ ఇంజిన్ అంటే మోడీ, ఈడీ'అని అర్థమైందని ట్విట్టర్ వేదికగా పేర్కొన్నారు. ఈడీ చీఫ్​గా బండిని నియమించినందుకు ప్రధాని మోదీకి ధన్యవాదాలు అంటూ ట్వీటారు.

ఎన్‌ఫోర్స్‌మెంట్‌ డైరక్టరేట్‌ అధినేతగా భాజపా రాష్ట్ర అధ్యక్షుడు బండి సంజయ్​ను నియమించినందుకు ప్రధాని మోదీకి ధన్యవాదాలు అంటూ మంత్రి కేటీఆర్ వ్యంగ్యంగా స్పందించారు. కేంద్ర ప్రభుత్వం, భాజపాపై కేటీఆర్ పలు అంశాలపై ట్విటర్​లో తనదైన శైలిలో స్పందించారు.

కేసీఆర్​ కూడా ఈడీ, సీబీఐ విచారణను ఎదుర్కోవాల్సి వస్తుందని భాజపా రాష్ట్ర అధ్యక్షుడు బండి సంజయ్ చేసిన వ్యాఖ్యలనేపథ్యంలో ప్రధానిని ఉద్దేశిస్తూ కేటీఆర్ ట్వీట్ చేశారు. దేశంలో ఉన్న డబుల్ ఇంజిన్ అంటే మోదీ, ఈడీ అని అర్థమైందని వ్యాఖ్యానించారు. అటు ఆదాని అంశంపైనా స్పందించిన కేటీఆర్... ప్రపంచ పేదరిక రాజధానిగా భారతదేశం... నైజీరియాను అధిగమించిందని.. ఇదే సమయంలో ఆదానీ బిల్ గేట్స్‌ను దాటి మరీ ప్రపంచంలోనే నాలుగో ధనవంతుడయ్యారని పేర్కొన్నారు. ఇవి దేశానికి సంబంధించి రెండు కఠోర వాస్తవాలను అని అన్నారు.

రైల్వేశాఖ సీనియర్ సిటిజన్లకు ఇచ్చే రాయితీలను ఎత్తివేస్తుందన్న వార్తలపైనా స్పందించిన కేటీఆర్... రైల్వే మంత్రి అశ్వినీ వైష్ణవ్‌ను ఉద్దేశించి మరో ట్వీట్ చేశారు. వృద్ధులను జాగ్రత్తగా చూసుకోవడం మన బాధ్యత మాత్రమే కాదని, విధి కూడా అన్న ఆయన... కేంద్ర ప్రభుత్వ నిర్ణయం బాధాకరమని వ్యాఖ్యానించారు. కరుణా హృదయంతో నిర్ణయాన్ని పునఃసమీక్షించాలని కోరారు.

రాష్ట్రపతిగా ఎన్నికైన ద్రౌపది ముర్ముకు కేటీఆర్ ట్విటర్ వేదికగా అభినందనలు తెలిపారు. మహిళా రిజర్వేషన్ బిల్లు, తెలంగాణలో గిరిజనుల రిజర్వేషన్ల పెంపు బిల్లు ఆమోదం పొందుతుందని ఆశాభావం వ్యక్తం చేశారు.ఆటవీహక్కుల చట్టం సవరణ బిల్లు ఆమోదం పొందుతుందని ట్వీట్ చేశారు.

• ఇదీ చూడండి: ముఖ్యమంత్రి కేసీఆర్‌కు ఈడీ విచారణ తప్పదు: బండి సంజయ్‌