ప్రభుత్వ ఉద్యోగులతో తెరాసది పేగుబంధం: కేటీఆర్​

వాట్సాప్ ద్వారా అసత్యాలను ప్రచారం చేస్తున్న భాజపా తీరును... ప్రజల్లో ఎండగట్టాలని తెరాస కార్యనిర్వాహక అధ్యక్షుడు కేటీఆర్​... పార్టీ శ్రేణులకు పిలుపునిచ్చారు. కాంగ్రెస్‌కు ఘనచరిత్ర ఉంది... కానీ భవిష్యత్‌ లేదని ఎద్దేవా చేశారు. ప్రతి ఓటరును వ్యక్తిగతంగా కలిసి.. ఆరున్నరేళ్లలో యువతకు, నిరుద్యోగులకు ప్రభుత్వం చేపట్టిన కార్యక్రమాలు వివరించాలని... కేటీఆర్​ దిశానిర్దేశం చేశారు.

భారతీయ జనతా పార్టీ... వాట్సాప్ ద్వారా అసత్యాలను ప్రచారం చేస్తోందని తెరాస కార్యనిర్వాహక అధ్యక్షుడు కేటీఆర్ ధ్వజమెత్తారు. గ్రేటర్‌ పరిధిలోని మంత్రులు, ఎమ్మెల్యేలు, కార్పొరేటర్లతో సమావేశమైన ఆయన... పట్టభద్రుల ఎమ్మెల్సీ ఎన్నికల్లో అనుసరించాల్సిన వ్యూహాన్ని దిశా నిర్దేశం చేశారు. భాజపా అబద్ధాలకు విద్యావంతులు ప్రభావితం కాకుండా చూడాలని.. పార్టీ శ్రేణులకు తెలిపారు. రాష్ట్రానికి చట్టబద్ధంగా దక్కాల్సిన దానికన్నా అదనంగా ఒక్క రూపాయి కూడా కేంద్రం ఇవ్వలేదన్న ఆయన... భాజపాకు ఓటడిగే అర్హత లేదన్నారు.

ప్రాజెక్టులకు నిధులు, ప్రత్యేక హోదాలు ఇవ్వలేదని.. ఇటీవల వైద్య కళాశాలల కేటాయింపుల్లోనూ మొండిచేయి చూపించిందని విమర్శించారు. పెట్రోల్, డీజిల్, గ్యాస్ ధరల పెరుగుదలను ప్రతీ ఒక్కరికి గుర్తు చేయాలని నేతలకు సూచించారు. కాంగ్రెస్‌కు చరిత్ర ఉంది కానీ.. భవిష్యత్తు లేదని ఎద్దేవా చేశారు. రాజకీయ పార్టీలకు ప్రతీ ఎన్నిక అత్యంత కీలకమేనని పేర్కొన్నారు. పార్టీ గెలుపునకు కృషి చేయాలని శ్రేణులకు సూచించారు.

అసత్య ప్రచారాలను తిప్పికొట్టాలి

ఉద్యోగాల భర్తీపై విపక్షాలు అసత్య ప్రచారం చేస్తున్నాయని.. దాన్ని బలంగా తిప్పికొట్టాలని పార్టీ శ్రేణులకు కేటీఆర్ పిలుపునిచ్చారు. గతంలో ఏ ప్రభుత్వ హయాంలో లేని విధంగా ఇప్పటికే లక్ష 33వేల ఉద్యోగాలు భర్తీ చేశామని పునరుద్ఘాటించారు. ప్రభుత్వ ఉద్యోగులు తెరాస ప్రభుత్వానికి వ్యతిరేకమనేది కేవలం దుష్ప్రచారమేనని అన్నారు. ప్రభుత్వ ఉద్యోగులతో తెరాసది పేగుబంధమని.. ప్రత్యేక రాష్ట్రం కోసం వారందరూ తెరాసతో కలిసి పనిచేశారని కేటీఆర్ అన్నారు.

సురభి వాణిదేవికి సానుకూల స్పందన

సురభి వాణిదేవికి అన్ని వర్గాల నుంచి సానుకూల స్పందన వస్తోందని.. ప్రత్యర్థులు కూడా అభినందించే సానుకూల పరిస్థితులు ఉన్నాయని.. ఆమె క్లీన్ ఇమేజ్ పట్టభద్రులకు కచ్చితంగా నచ్చుతుందని కేటీఆర్ విశ్వాసం వ్యక్తం చేశారు. గ్రేటర్ హైదరాబాద్‌లోని నేతలందరూ ఐక్యంగా పనిచేసి సురభి వాణీదేవిని గెలిపించాలని కేటీఆర్ స్పష్టం చేశారు. సమావేశంలో తెరాస పార్లమెంటరీ పార్టీ నేత కె.కేశవరావు, డిప్యూటీ స్పీకర్ పద్మారావు, మంత్రులు మహమూద్ అలీ, తలసాని శ్రీనివాసయాదవ్, ఎమ్మెల్సీ తెరాస అభ్యర్థి సురభి వాణీదేవి తదితరులు పాల్గొన్నారు.

నేటి నుంచి ప్రచారం..

సురభి వాణీదేవి.. ఇవాళ నుంచి ఎన్నికల ప్రచారం చేపట్టనున్నారు. చేవేళ్ల, వికారాబాద్‌లో జరగనున్న ప్రచారసభలో పాల్గొంటారు.

ఇదీ చూడండి:'వాళ్లకు హై కమాండ్​ దిల్లీలో ఉంటే.. మనకు గల్లీలో ఉంటది'