KTR Changed Twitter Account Name: టీఆర్‌ఎస్ పేరు బీఆర్‌ఎస్‌గా మారిన నేపథ్యంలో పురపాలక, ఐటీ శాఖ మంత్రి కేటీఆర్ తన ట్విటర్ హ్యాండిల్‌లోనూ మార్పులు చేశారు. 'కేటీఆర్ టీఆర్‌ఎస్' నుంచి 'కేటీఆర్ బీఆర్‌ఎస్' గా మార్చారు. టీఆర్‌ఎస్ వర్కింగ్ ప్రెసిడెంట్ అన్న హోదాను కూడా ప్రొఫైల్ నుంచి మంత్రి కేటీఆర్ తొలగించారు.
పురపాలక, పరిశ్రమలు, ఐటీ శాఖ మంత్రి, సిరిసిల్ల శాసనసభ్యుడు హోదా మాత్రమే మంత్రి కేటీఆర్ ట్విటర్ ప్రొఫైల్‌లో పెట్టుకున్నారు. ట్విటర్ హ్యాండిల్ మారినందున వెరిఫై టిక్‌ను తొలగించారు. హ్యాండిల్ మారినందున వెరిఫై టిక్ తొలగిస్తారని... అన్ని పరిశీలించాక మళ్లీ వెరిఫై టిక్ ఇస్తారని సమాచారం.
ఇదిలా ఉంటే వారం క్రితం ప్రపంచ ఆర్థిక వేదిక సదస్సు సందర్భంగా ఐటీ శాఖ మంత్రి కేటీఆర్ మరో ఘనత సాధించారు. సామాజిక మాధ్యమాల ద్వారా.. ప్రభావితం చేసే జాబితాలో ఆయన చోటు సంపాదించారు. ప్రపంచ వ్యాప్తంగా మొదటి 30 మంది జాబితాలో కేటీఆర్కు స్థానం దక్కింది. భారతదేశం నుంచి ఇద్దరు యువనేతలు మాత్రమే ఈ జాబితాలో ఉన్నారు. అందులో కేటీఆర్ 12వ స్థానం కాగా మరొకరు ఎంపీ రాఘవ్ చద్దా 23వ స్థానంలో నిలిచారు. 22వ స్థానంలో కేటీఆర్ ప్రాతినిధ్యం వహిస్తున్న తెలంగాణ ఐటీ మంత్రిత్వ శాఖ ఉన్నాయి.