వైద్య ఆరోగ్యశాఖ కార్యదర్శి రిజ్వీ, ఆరోగ్య కుటుంబ సంక్షేమ కమిషనర్‌ వాకాటి కరుణ, ప్రజారోగ్య సంచాలకులు డాక్టర్‌ జి.శ్రీనివాసరావు తదితరులతో కలిసి మంత్రి ఈటల రాజేందర్... అన్ని జిల్లాల వైద్యాధికారులతో టెలీకాన్ఫరెన్స్‌ నిర్వహించారు. హోం ఐసొలేషన్‌లో ఉంటున్నవారిలో కొందరు నిర్లక్ష్యం చేయడం వల్ల శ్వాసకోశాల్లో తీవ్ర ఇబ్బందులు ఎదురవుతున్నాయని మంత్రి తెలిపారు. ఈ నేపథ్యంలో బాధితులకు ఇంటి వద్ద ఆశా, ఆరోగ్య కార్యకర్తలు రోజుకు రెండుసార్లు రక్తంలో ఆక్సిజన్‌ శాతం, జ్వరం తదితర పరీక్షలు చేయాలని ఆదేశించారు. అప్పుడే ప్రాణాపాయ స్థితికి చేరకుండా కాపాడగలుగుతామని తెలిపారు.
పెరుగుదల తీవ్రంగా లేదు..
రక్త పరీక్షలు నిర్వహించి.. తీవ్రతను బట్టి అవసరమైతే పెద్దాసుపత్రికి తరలించాలని... లక్షణాలున్నవారు ఏ ప్రాంతం నుంచి వచ్చినా పరీక్షలు చేయాలన్నారు. టెలీ వైద్య విధానం ద్వారా అనుమానాలను నివృత్తి చేయాలని సూచించారు. ఇందుకు ఐఎంఏ వైద్యుల సేవలనూ వినియోగించుకుంటామని తెలిపారు. వారం రోజులుగా కేసుల పెరుగుదల తీవ్రంగా లేదని. త్వరలోనే వ్యాప్తి తగ్గుతుందని ఆశిస్తున్నట్లు వెల్లడించారు. వైద్య ఆరోగ్యశాఖలో వైద్యులు, నర్సులు, ఇతర సిబ్బంది అవసరమైతే వెంటనే నియామకాలు జరపాలన్నారు. వైద్యాధికారులకు వాహన భత్యం అందేలా చర్యలు తీసుకోవాలని మంత్రి ఆదేశాలు జారీ చేశారు.