ప్రపంచంలో ఉన్న ఏడు వేల మాతృభాషల్లో ప్రతి రెండు వారాలకు ఒక భాష అంతరించిపోతోందని మహారాష్ట్ర మాజీ గవర్నర్ విద్యాసాగర్ రావు ఆవేదన వ్యక్తం చేశారు. ప్రపంచ మాతృ భాషా దినోత్సవం సందర్భంగా హైదరాబాద్ బేగంపేటలో తెలుగు మహిళా రచయితల ఫోరం ఆధ్వర్యంలో ఏర్పాటు చేసిన కార్యక్రమంలో ఆయన పాల్గొన్నారు. ప్రభుత్వ సలహాదారు రమణాచారి, మాజీ ఐపీఎస్ అధికారి జేడీ లక్ష్మీ నారాయణ, మహిళా రచయితలు తదితరులు హాజరయ్యారు.
మూలాలను కోల్పోతున్నారు
ప్రతి ఒక్కరూ వారి మాతృ భాషలో సాంకేతికతను అభ్యసించడం ద్వారా అది దేశాభివృద్ధికి తోడ్పడుతుందని విద్యాసాగర్రావు సూచించారు. కేవలం ఆంగ్ల భాషపైనే దృష్టి పెట్టే విధంగా విద్యార్థులను తయారు చేయడంతో వారు మూలాలను కోల్పోతున్నారని వెల్లడించారు.