Metro train timings: అమల్లోకి మెట్రో సేవల పొడిగింపు.. ప్రయాణికులతో స్టేషన్లు రద్దీ.!

మెట్రో ట్రైన్​ సేవల ఆలస్యంపై ట్విట్టర్​ ద్వారా మంత్రి కేటీఆర్​ దృష్టికి ఓ యువకుడు ఇటీవల తీసుకెళ్లిన విషయం తెలిసిందే. దానిపై స్పందించిన మంత్రి కేటీఆర్​.. సమస్యను పరిష్కరించాలని మెట్రో ఎండీకి రీ ట్వీట్​ చేశారు. దీంతో నేటి నుంచి ప్రయాణికులు కోరినట్లుగా ఉదయం 6 గంటలకే మెట్రో రైలు సేవలు ప్రారంభించారు.

ప్రయాణికుల విజ్ఞప్తి మేరకు నేటి నుంచి హైద‌రాబాద్ మెట్రో రైలు సేవలు పొడిగించారు. ఉదయం 6 గంటలకు తొలి మెట్రో ట్రైన్​ ప్రారంభం కాగా.. చివరి రైలు రాత్రి 10.15కు బయలుదేరనుంది. ఉద‌యం 6 గంట‌ల నుంచి తొలి మెట్రో రైలు ప్రారంభం కావడంతో పలు మెట్రో స్టేషన్లు ప్రయాణికులతో కిటకిలాడాయి.

మెట్రో ట్రైన్​ సేవ‌లు పొడిగించాల‌ని ట్విట్టర్‌ ద్వారా అభినవ్​ అనే ఓ ప్రయాణికుడు మంత్రి కేటీఆర్​ను కోరారు. ఆ అంశాన్ని మెట్రో ఎండీ ఎన్వీఎస్ రెడ్డి దృష్టికి కేటీఆర్ తీసుకెళ్లారు. ఆయన సూచన మేరకు ఎండీ ఎన్వీఎస్ రెడ్డి ఈ మార్పులు చేశారు.

క‌రోనా స‌మ‌యంలో కొద్ది రోజులు మెట్రో సేవ‌లు నిలిచిపోవ‌డంతో న‌ష్టాలు వ‌చ్చాయి. లాక్‌డౌన్ ముగిసిన త‌రువాత కొద్ది రోజుల పాటు మెట్రో రైలు త‌క్కువ స‌మ‌యం న‌డ‌వ‌డంతో ఆదాయం అంత‌గా రాలేదు. కొవిడ్​ ప్రభావం అంత‌గా లేక‌పోవ‌డం, కార్యాల‌యాలు అన్నీ తెరుచుకోవ‌డంతో ఇప్పుడిప్పుడే మెట్రోకు ఆదాయం వ‌స్తోంది. ఇప్పుడు స‌మ‌యాన్ని ఉద‌యం 6 గంట‌ల నుంచి నడ‌ప‌డంతో మ‌రింత ఆదాయం పెరిగే అవ‌కాశం ఉన్నట్టు మెట్రో వర్గాలు తెలిపాయి.

ఇదీ చదవండి:Yadadri Hundi Money Counting: యాదాద్రీశుని 21 రోజుల ఆదాయం ఎంతంటే?