బియ్యం రవాణాలో మరింత వేగం పెంపు కోసం సర్కారు ప్రత్యేక దృష్టి సారించింది. కరోనా, లాక్డౌన్ నేపథ్యంలో పేదలకు కడుపునిండా భోజనం అందించాలన్న ఉద్దేశంతో… కేంద్ర ప్రభుత్వ మార్గదర్శకాలకు అనుగుణంగా సీఎం కేసీఆర్(CM KCR)… ఈ నెల 5 నుంచి చేపట్టనున్న ఉచిత బియ్యం నాణ్యతలో రాజీ పడొద్దని పేర్కొన్నారు. ఈ విషయంలో ఎలాంటి జాప్యానికి తావు లేకుండా 4వ తేదీలోగా గోదాముల నుంచి ఛౌక ధరల దుకాణాలకు బియ్యం చేరవేయాలని ఆదేశాలు జారీ చేశారు.
హైదరాబాద్ ఎర్రమంజిల్ పౌరసరఫరాల భవన్లో ఉచిత బియ్యం పంపిణీపై ఆ సంస్థ ఛైర్మన్ మారెడ్డి శ్రీనివాస్రెడ్డి సమీక్షించారు. కార్యక్రమంలో పౌరసరఫరాల శాఖ సంయుక్త కమిషనర్ ఉషారాణి, ఉప కమిషనర్ పద్మజ, సహాయ కమిషనర్ శ్రీనివాస్ రెడ్డి, పౌర సరఫరాల సంస్థ జనరల్ మేనేజర్ రాజారెడ్డి, పీడీఎస్ ఉప మేనేజర్ మంగమ్మ పాల్గొన్నారు.
ఆశించిన స్థాయిలో బియ్యం రవాణా జరగకపోవడం పట్ల ఛైర్మన్ తీవ్ర అసంతృప్తి వ్యక్తం చేశారు. బియ్యం రవాణాలో ఎందుకు జాప్యం జరుగుతోందని అధికారులను ప్రశ్నించారు. రాష్ట్రంలో 87.54 లక్షల కుటుంబాల్లో అర్హులైన ప్రతి ఒక్కరికి 15 కిలోల చొప్పున 4,03,911 మెట్రిక్ టన్నుల బియ్యం అవసరమవుతాయి. 3వ తేదీ వరకు అన్ని రేషన్ షాపులకు చేరుకోకపోవడం ఏంటని ప్రశ్నించారు.