మజిల్​ మానియా జాతీయ స్థాయిలో మొదటి స్థానంలో నిలిచిన హైదరాబాదీ

కండగలిగిన వాడే మనిషోయ్​ అన్న గురజాడ మాటలను వంటి పట్టించుకున్నాడు ఆ యువకుడు. మజిల్ మానియా ( కండరాల ప్రదర్శన) పోటీల్లో భాగ్యనగర యువకుడు జాతీయ స్థాయిలో సత్తాచాటాడు. మజిల్స్​ మానియా పోటీల్లో అత్తాపూర్​కు చెందిన మహ్మద్​ అక్రమ్​ జాతీయ స్థాయి పోటీలో విజేతగా నిలిచాడు.

జాతీయ స్థాయి మజిల్​మానియా పోటీల్లో హైదరాబాద్​కు చెందిన యువకుడు విజేతగా నిలిచాడు. హైదరాబాద్​ అత్తాపూర్​ డైరీ ఫామ్​కు చెందిన మహ్మద్​ అక్రమ్​కు చిన్నతనం నుంచే కసరత్తులంటే ఎనలేని మక్కువ. వ్యాయామంపై ఆసక్తితో ఎక్కువ భాగం జిమ్​లోనే గడిపేవాడు. కఠోర ఆహార నియమాలు పాటిస్తూ జాతీయ స్థాయి పోటీలకు సిద్ధమయ్యాడు. ముంబైలో జరిగిన తుది పోటీల్లో విజేతగా నిలిచి తన కలను సాకారం చేసుకోవడమే కాకుండా రాష్ట్రానికి కీర్తి ప్రతిష్ఠలు తెచ్చిపెట్టాడు.

అత్తాపూర్​లోని ఓ ఫిట్​నెస్ సెంటర్​లో శిక్షకుడిగా పని చేస్తున్న అక్రమ్​ ప్రణాళిక ప్రకారం శ్రమిస్తే ఎంతటి లక్ష్యాన్నైనా సాధించవచ్చని అంటున్నాడు. ప్రభుత్వం స్పందించి ఆర్థిక సాయం అందిస్తే రాష్ట్రం పేరు నిలబెడతానని ధీమా వ్యక్తం చేస్తున్నాడు.

ఇదీ చూడండి: రాష్ట్రంలో అక్షరాస్యత పెంచే దిశగా ప్రభుత్వం కసరత్తు