తెలుగు రాష్ట్రాల్లో కరోనా వైరస్‌ పాజిటివ్‌ కేసుల వల్ల ప్రతి ఒక్కరిలో ప్రతికూల ఆలోచనలు వేధిస్తున్నాయి. వీరిలో అధికశాతం ఒంటరితనం, భయం, మానసిక ఆందోళనతో సతమతమవుతున్నట్టు సికింద్రాబాద్‌ సింధీ కాలనీలోని రోష్ని స్వచ్ఛంద సంస్థ హెల్ప్‌లైన్‌కు వస్తున్న ఫోన్‌కాల్స్‌ ద్వారా స్పష్టమవుతోంది. ఆ సంస్థ ప్రతినిధులు మానసిక ఒత్తిళ్లు, కుంగుబాటు, ఆత్మహత్య ఆలోచనల నుంచి బయటపడేసేందుకు సహకారం అందిస్తున్నారు. ఫోన్‌కాల్‌ ద్వారా బాధితులకు ఓదార్పును అందిస్తూ జీవితంపై సానుకూల దృక్పథం అలవరిచేందుకు కృషి చేస్తుంది. కొవిడ్‌-19 నేపథ్యంలో ప్రకటించిన లాక్‌డౌన్‌ సమయంలో ప్రతిరోజూ ఉదయం 11 నుంచి రాత్రి 9 గంటల వరకు ఫోన్‌కాల్స్‌ స్వీకరిస్తూ మానసిక నిపుణుల సలహాలు, సూచనలు అందిస్తున్నారు. వివిధ రుగ్మతలతో బాధపడుతున్న వారికి వైద్యుల సూచనతో ఉచితంగా మందులను ఇంటివద్దకు చేరవేస్తున్నారు. మూడు వారాలుగా రోష్ని స్వచ్ఛంద సంస్థ హెల్ప్‌లైన్‌కు రోజూ 65-70 వరకు ఫోన్‌కాల్స్‌ వస్తున్నాయి. వీటిలో 10-15 వరకు వైరస్‌కు సంబంధించిన అనుమానాలు ఉంటున్నట్టు ఆ సంస్థ డైరెక్టర్‌ ఉషశ్రీ తిపిర్నేని తెలిపారు.
అభద్రతా భావం.. అగమ్యగోచరం
కొవిడ్‌-19 సోకితే బయటపడగలమా? లేదా? ఆనే ఆలోచనలు.. స్నేహితులతో గడిపి ప్రస్తుతం ఒంటరి అయ్యామనే భావన యువతలో కనిపిస్తోంది. పొగతాగటం, మద్యపానం, మత్తుపదార్థాలకు అలవాటుపడిన వారు కొద్దిరోజులుగా వాటికి దూరమై వింతగా ప్రవర్తిస్తున్నారు. 5-6శాతం మంది ఉద్యోగులు కరోనా ప్రభావంతో కొలువులు పోతే కుటుంబం పరిస్థితి ఏమవుతుందనే ఆందోళన పడుతున్నారని ఉషశ్రీ వివరించారు.