ఎన్నికల్లో పోటీ చేయగానే బాధ్యత తీరిపోదు. ఎన్నికల ఖర్చుల తాలూకూ లెక్కలు చెబితేనే ఆ ప్రక్రియ ముగిసినట్లు. ఆ... ఏముందిలే! ఎవరొచ్చి అడుగుతారులే! అనే అభిప్రాయం చాలామందిలో ఉంటుంది. అలాంటి భావనతో ఎన్నికల వ్యయ వివరాలు అందజేయని ఫలితంగా తెలంగాణలో స్థానిక ఎన్నికల్లో పోటీ చేసిన 40 వేల మందికిపైగా అభ్యర్థులపై అనర్హత వేటుపడింది. వీరిలో గెలిచిన వారు పదవులు కోల్పోతుండగా, ఓడిన వారు మూడేళ్లపాటు అనర్హతతో ఎన్నికలకు దూరం కానున్నారు.
రాష్ట్రంలో 2018లో గ్రామ పంచాయతీ, మండల పరిషత్‌ ఎన్నికలు జరిగాయి. ఈ ఎన్నికల్లో సర్పంచ్‌ అభ్యర్థులుగా 36,501 మంది, వార్డు సభ్యులుగా 2,30,856 మంది, ఎంపీటీసీలుగా 19,095మంది, జడ్పీటీసీలుగా 2,429 మంది పోటీ చేశారు. రాష్ట్ర ఎన్నికల సంఘం మార్గదర్శకాల ప్రకారం స్థానిక సంస్థల ఎన్నికల్లో పోటీచేసే అభ్యర్థుల గరిష్ఠ వ్యయ పరిమితి నాలుగు లక్షల రూపాయలు. కనిష్ఠ వ్యయ పరిమితి రూ.30 వేలు.
ఈ వ్యయాల తాలూకూ వివరాలను ఎన్నికల ప్రక్రియ ముగిసిన 45 రోజుల్లో ఎన్నికల అధికారికి అందజేయాలని ఎన్నికల సంఘం మార్గదర్శకాల్లో పేర్కొంది. అందుకు భిన్నంగా పోటీ చేసిన వారిలో సుమారు 40 వేల మందిపైగా నిర్దేశించిన గడువులోపు వ్యయాల తాలూకూ వివరాలను సమర్పించలేదు. ఈ నేపథ్యంలో వారిని గుర్తించి చర్యలు తీసుకునేందుకు ఎన్నికల సంఘం అధికారులు శ్రీకారం చుట్టారు.
నేరుగా మండల పరిషత్‌ అభివృద్ధి అధికారుల(ఎంపీడీఓ)కు ఉత్తర్వులు పంపడం ద్వారా చర్యలు చేపడుతున్నారు. అలా ఇప్పటికే వివిధ జిల్లాల్లో ఎన్నికల్లో పోటీ చేసి గెలుపొందిన సర్పంచులు, ఎంపీటీసీలు, జడ్పీటీసీలు, వార్డు సభ్యులపై అనర్హత వేటు వేశారు. మరికొందరికి ఆ దిశగా అనర్హత నోటీసులు జారీ చేశారు.