హైదరాబాద్‌ మహా నగరాభివృద్ధి సంస్థ(హెచ్‌ఎండీఏ) పరిధిలో సూక్ష, చిన్నతరహా, మధ్య తరహా పరిశ్రమలు 25 వేల నుంచి 30 వేల వరకు ఉన్నాయి. ప్రధానంగా హైదరాబాద్‌, రంగారెడ్డి, మేడ్చల్‌ జిల్లాల్లో పరిశ్రమలు అధికంగా ఉన్నాయి.
ఇక్కడి చిన్న పరిశ్రమల్లో అన్ని రకాల పరికరాలను ఉత్పత్తి చేస్తున్నారు. రక్షణ రంగానికి ఉపయోగపడే వస్తువులను తయారుచేసే పెద్ద పరిశ్రమలకు అనుబంధ పరికరాలను ఇక్కడి చిన్న పరిశ్రమల్లోనే తయారుచేసి పంపిస్తున్నారు. ఎలక్ట్రికల్‌, ఎలక్ట్రానిక్‌, ప్లాస్టిక్‌ ఇలా అనేక రకాల వస్తువులను ఈ పరిశ్రమల్లో తయారు చేస్తున్నారు. ఇక్కడ దాదాపు ఏటా రూ.50 వేల కోట్ల టర్నోవర్‌తో ఉత్పత్తులు జరుగుతున్నాయి.
15 లక్షలమంది కార్మికులు పని చేస్తుండగా ఇందులో 5 లక్షలమంది వివిధ రాష్ట్రాలకు చెందిన వలస కూలీలే. దాదాపు నెలన్నర పాటు లాక్‌డౌన్‌తో చిన్న పరిశ్రమలు కూడా మూతపడ్డాయి. పదిహేను రోజుల కిందట పరిశ్రమలను తెరవడానికి ప్రభుత్వం అనుమతి ఇచ్చింది. దాదాపు అన్ని పరిశ్రమలను తెరిచినా 40 శాతం కూడా పని చేయడం లేదంటున్నారు.ఎలక్ట్రానిక్‌, ఫార్మా, వ్యవసాయ సంబంధ రంగాలతో పాటు వివిధ రంగాలకు సంబంధించి ఉప ఉత్పతులను తయారుచేసి భారీ పరిశ్రమలకు పంపిస్తుంటారు.