రిజిస్ట్రేషన్లకు ముందుకురాని భారీ నిర్మాణ సంస్థలు!

భాగ్యనగర చుట్టుపక్కల జిల్లాలో భూములు-భవనాల రిజిస్ట్రేషన్లు చేయించుకునేందుకు ఎవరూ ముందుకు రావట్లేదు. కరోనా నేపథ్యంలో మూతపడిన రిజిస్ట్రేషన్ల కార్యాలయాలు.. కొద్ది రోజుల కిందట తెరుచుకున్నాయి. క్రమంగా రిజిస్ట్రేషన్ల సంఖ్య పెరుగుతున్నా లక్ష్యానికి అనుగుణంగా ఆదాయం మాత్రం రావడం లేదు.

నగరం చుట్టుపక్కల జిల్లాల్లోని భారీ నిర్మాణ సంస్థలు భూములు-భవనాలను రిజిస్ట్రేషన్లు చేయించేందుకు ముందుకు రావట్లేదు. దీనికి సాంకేతికంగా అనేక కారణాలున్నాయని రియల్‌ ఎస్టేట్‌ ప్రతినిధులు చెబుతున్నారు. కరోనా నేపథ్యంలో మూతపడిన రిజిస్ట్రేషన్ల కార్యాలయాలు.. కొద్ది రోజుల కిందట తెరుచుకున్న విషయం తెలిసిందే. క్రమంగా రిజిస్ట్రేషన్ల సంఖ్య పెరుగుతున్నా లక్ష్యానికి అనుగుణంగా ఆదాయం మాత్రం రావడం లేదు. మరో పదిహేను రోజుల్లో పూర్తిస్థాయిలో ఊపందుకుని గత ఏడాదిలానే ఆదాయం వచ్చే అవకాశం ఉందని అధికారులు చెబుతున్నారు.

ఆశించిన స్థాయిలో లేవు..

రోజుకు సుమారు 4 వేలు.. దాదాపు 45 రోజుల తర్వాత కార్యాలయాలు తెరుచుకోగా భారీగా అపార్టుమెంట్లలో ఫ్లాట్ల రిజిస్ట్రేషన్లు జరుగుతాయని అంతా అనుకున్నారు. గత ఏడాది రోజూ 6వేలకు పైగా జరిగేవి. దీనిమీద నిత్యం రూ.20కోట్లు నుంచి రూ.22 కోట్ల వరకు ఆదాయం వచ్చేది. గత ఆర్థిక సంవత్సరంలో రూ.7050 కోట్ల మేర ఆదాయం వచ్చింది. లాక్‌డౌన్‌ ఆంక్షల తర్వాత కార్యాలయాలను తిరిగి తెరిస్తే ప్రస్తుతం నాలుగువేల వరకు డాక్యుమెంట్ల రిజిస్ట్రేషన్లు జరుగుతున్నాయి. రోజూ రూ.10కోట్ల నుంచి రూ.12 కోట్ల వరకు ఆదాయం వస్తోంది. డాక్యుమెంట్ల సంఖ్య బాగానే ఉన్నా గత ఏడాదిలా ఆదాయం రాకపోవడానికి అనేక కారణాలు ఉన్నాయని అధికారులు చెబుతున్నారు.

తగ్గించిన రుణాల మంజూరు వేగం

హైదరాబాద్‌, రంగారెడ్డి, మేడ్చల్‌ జిల్లాల్లో భారీ రియల్‌ ఎస్టేట్‌ ప్రాజెక్టులు ఉన్నాయి. ఇందులో కొన్ని ఫ్లాట్లు రూ.కోటిపైనే ధర పలుకుతున్నాయి. ఇటువంటి భారీ ప్రాజెక్టుల్లో ఫ్లాట్లు ప్రస్తుతం రిజిస్ట్రేషన్లు జరగడం లేదు. లాక్‌డౌన్‌ నేపథ్యంలో బ్యాంకులు రుణాలను మంజూరులో వేగాన్ని తగ్గించాయి. క్షేత్రస్థాయిలో బ్యాంకు అధికారులు తనిఖీలకు మొన్నటి వరకు వెళ్లే అవకాశం లేకపోగా రుణాల మంజూరు దాదాపుగా నిలిచిపోయింది.

వలస కార్మికులు లేక..

మరోవైపు నిర్మాణ పనులు నిలిచిపోయాయి. కొన్ని నిర్మాణ సంస్థల ముఖ్యప్రతినిధులు ఇతర రాష్ట్రాల్లో ఉండిపోవడం వల్ల వారు హైదరాబాద్‌ రాలేక నిలిచిపోయాయని అధికారులు చెబుతున్నారు. క్రమంగా ఆంక్షలను సడలిస్తున్నందున కొన్ని ముఖ్యమైన ప్రాజెక్టుల్లో పెండింగ్‌ పనులు మొదలయ్యాయి. వలస కార్మికులు తమ సొంత రాష్ట్రాలకు వెళుతున్నా... స్థానికంగా ఉన్న కూలీలతో పనులను పూర్తి చేయాలని ఆయా సంస్థలు నిర్ణయానికి వచ్చాయి. దీంతో వచ్చే వారం రోజుల్లో వీటి సంఖ్య పెరుగుతుందని అధికారులు చెబుతున్నారు. గత ఏడాదిలానే ఆదాయం సమకూరే అవకాశం ఉందని అంటున్నారు.

ఇదీ చదవండి:వలస కూలీలను ఫోన్​ నంబర్​తో పట్టేస్తారు