'ఆర్టీసీ పరిరక్షణ కోసమే ఉద్యమం'

ఆర్టీసీ కార్మికుల సమ్మెకు సంఘీభావంగా హైదరాబాద్​లోని​ ఇందిరాపార్క్​ ధర్నా చౌక్​ వద్ద వామపక్షాలు సామూహిక దీక్ష చేపట్టాయి. బలిదానాల పునాదులపైన ఆవిర్భవించిన తెలంగాణలో ప్రభుత్వ సంస్థలను ప్రైవేట్‌ పరం చెయ్యాలనే కుట్ర జరుగుతుందని వామపక్ష నేతలు మండిపడ్డారు. జీతాల కోసం సమ్మె జరగడంలేదని... ఆర్టీసీ పరిరక్షణ కోసం ఉద్యమం జరుగుతుందన్నారు.

హైదరాబాద్​లోని​ ఇందిరాపార్కు ధర్నా చౌక్​ వద్ద ఆర్టీసీ కార్మికుల సమ్మెకు మద్దతుగా వామపక్ష పార్టీలు సామూహిక దీక్షను చేపట్టాయి. సామూహిక దీక్షను ప్రొఫెసర్‌ నాగేశ్వర్‌ ప్రారంభించారు. సీపీఎం, సీపీఐ రాష్ట్ర కార్యదర్శులు తమ్మినేని వీరభద్రం, చాడ వెంకట్‌ రెడ్డి, ఆర్టీసీ ఐకాస నేతలు అశ్వత్థామ రెడ్డి, రాజిరెడ్డి, విద్యావేత్త చుక్క రామయ్యతో పాటు ఇతర వామపక్ష పార్టీల నేతలు దీక్షలో పాల్గొన్నారు.

ఆత్మహత్యలకు పాల్పడొద్దు

కార్మికుల జీతాల కోసం సమ్మె జరగడంలేదని... ఆర్టీసీ పరిరక్షణ కోసం ఉద్యమం జరుగుతుందని ప్రొఫెసర్‌ నాగేశ్వర్‌ అన్నారు. కార్మికుల వల్లే ఆర్టీసీకి నష్టాలు వాటిల్లుతున్నట్లు ప్రభుత్వం అబద్ధాలు ప్రచారం చేస్తోందని అన్నారు. హైకోర్టు చర్చలు జరపమంటే... కేసీఆర్‌ చర్చల ప్రసక్తే లేదంటున్నారని సీపీఐ రాష్ట్ర కార్యదర్శి చాడ వెంకట్‌ రెడ్డి మండిపడ్డారు. కార్మికులు ఆత్మహత్యలకు పాల్పడొద్దని... వామపక్షాలు అండగా ఉంటాయన్నారు.

పోరాటం ఉద్ధృతం

ఇప్పటికైనా సామరస్యంగా చర్చలు జరపాలని ప్రముఖ విద్యావేత్త చుక్కా రామయ్య ప్రభుత్వానికి సూచించారు. ఇది ఆర్టీసీ కార్మికులు కేసీఆర్‌కు మధ్య జరుగుతున్న పోరాటం కాదని... ముఖ్యమంత్రికి తెలంగాణ ప్రజలకు మధ్య సాగుతున్న పోరాటమన్నారు సీపీఎం రాష్ట్ర కార్యదర్శి తమ్మినేని వీరభద్రం.

19న బంద్​

19న జరిగే బంద్​కు అందరూ సహకరించాలని వామపక్షాలు కోరాయి. కార్మికుల ప్రాణాలు పోతన్నా మొండిగా వ్యవహరిస్తే ప్రభుత్వానికే నష్టమని హెచ్చరించారు. వెంటనే ఆర్టీసీ కార్మికులతో చర్చలు జరపాలని డిమాండ్​ చేశారు. లేని పక్షంలో పోరాటం ఉద్ధృతం చేస్తామన్నారు.

ఇదీ చూడండి: ఆర్టీసీ సమ్మెపై సీఎం కేసీఆర్ సుదీర్ఘ సమీక్ష