హైదరాబాద్‌ నెక్లెస్‌రోడ్డులో నీరా స్టాల్‌ నిర్మాణానికి మంత్రులు కేటీఆర్, శ్రీనివాస్ గౌడ్ శంకుస్థాపన చేశారు. వేల ఏళ్ల క్రితం నుంచి కల్లు గీత వృత్తి ఉందని మంత్రి శ్రీనివాస్ గౌడ్ పేర్కొన్నారు. గీతవృత్తికి అనుబంధంగా ఎన్నో వృత్తులు అభివృద్ధి చెందాయని వ్యాఖ్యానించారు.
''కల్లుగీత వృత్తి పన్ను రద్దు కోసం ఎన్నో పోరాటాలు జరిగాయి. ఏ ప్రభుత్వమూ తీసుకోని నిర్ణయాన్ని సీఎం కేసీఆర్ తీసుకున్నారు. గత పాలకులు కల్లు దుకాణాలు మూసివేయించి ఎన్నో కుటుంబాలను రోడ్డున పడేశారు. ప్రమాదవశాత్తు మరణించిన కల్లుగీత కార్మికులకు ఈ ప్రభుత్వం రూ.5 లక్షల పరిహారం ఇస్తోంది. హరితహారంలో కూడా ఈత చెట్లు నాటుతూ కేసీఆర్ ప్రభుత్వం ప్రోత్సహిస్తోంది. నగరంలో ప్రముఖ స్థలంలో నీరా స్టాల్‌ ఏర్పాటుకు స్థలం కేటాయించారు. కొందరు కల్లుగీత వృత్తిని కుట్రపూరితంగా దెబ్బతీశారు. కుల వృత్తుల వారి ఆత్మగౌరవం కాపాడేందుకు సీఎం ఎన్నో చర్యలు చేపట్టారు.''