రమణీయం ఆ నాట్యం. రసమయం ఆ చిన్నారుల నృత్యం. అత్యంత రసరమ్య మధురంగా సాగిన కూచిపూడి నృత్య ప్రదర్శన చూపరులను కట్టిపడేసింది. మరీ ముఖ్యంగా కూచిపూడి నృత్య కళాభిమానులకు కావల్సినంత ఆనందాన్ని పంచింది. ఈరోజు హైదరాబాద్ మాదాపూర్లో జరిగిన కూచిపూడి నృత్య ప్రదర్శన ప్రేక్షకులను మంత్ర ముగ్ధుల్ని చేసింది.
ప్రముఖ కూచిపూడి నృత్య కళాకారిణి రమాదేవి శిష్య బృందం అబ్బుర పరిచే ప్రదర్శన కనబరిచింది. శిల్పారామంలో నిర్వహించిన ఈ కార్యక్రమంలో చిన్నారుల నృత్యం, అభినయం, వారి హావభావావాలు ప్రేక్షకులను కట్టిపడేశాయి. వారి నృత్య కళాపోషణ ఆద్యంతం తిలకించేలా కనులు తిప్పుకోకుండా చేసింది. శిల్పారామంలోని శ్రీసాయి నటరాజ అకాడమీ ఆఫ్‌ కూచిపూడి డ్యాన్స్‌ ఆధ్వర్యంలో ప్రముఖ గురువు రమాదేవి శిష్య బృందంచే "కూచిపూడి నృత్య రవళి" పేరుతో నృత్య ప్రదర్శన ఏర్పాటు చేశారు. ఈ కార్యక్రమంలో చిన్నారులు వివిధ నృత్యాంశాలను నయన మనోహారంగా ప్రదర్శించి కూచిపూడి నృత్య ప్రియులను అలరించారు.
