KTR tweet on Telangana Electricity Sector : నిత్యకోతల నుంచి నిరంతర వెలుగులోకి 'తెలంగాణ'

KTR tweet on Telangana Power Sector : రాష్ట్రం ఏర్పడిన నాడు.. తెలంగాణలో ఆవరించి ఉన్న చిమ్మ చీకట్లను చీల్చుకుంటూ, విద్యుత్తు రంగంలో అద్భుత రీతిలో పురోగతి సాధించిందని రాష్ట్ర ఐటీ, పరిశ్రమల శాఖ మంత్రి కేటీఆర్ అన్నారు. దేశానికే దారిచూపే 'టార్చ్‌ బేరర్‌'గా తెలంగాణ రాష్ట్రం నిలిచిందని ఉద్ఘాటించారు. దశాబ్ది ఉత్సవాల్లో భాగంగా ఇవాళ విద్యుత్ విజయోత్సవం నిర్వహిస్తున్నందున తెలంగాణ విద్యుత్ రంగంలో తొమ్మిదేళ్లలో జరిగిన పురోగతిపై ట్వీట్ చేశారు.

KTR Tweet on Electricity Day celebrations in Telangana : తెలంగాణ రాష్ట్రం విద్యుత్ రంగంలో అద్భుత రీతిలో పురోగతి సాధించి.. దేశానికి టార్చ్ బేరర్​గా నిలిచిందని మంత్రి కేటీఆర్ అన్నారు. ఇవాళ విద్యుత్ విజయోత్సవాల్లో భాగంగా "తెలంగాణ విద్యుత్ ప్రగతి - నిత్య కోతల నుంచి నిరంతర వెలుగుల ప్రస్థానం" అంటూ కేటీఆర్ ట్వీట్ చేశారు. కరెంట్ కోతలు, పవర్ హాలీడేలు, కరెంట్‌ కోసం ధర్నాలు, సబ్‌స్టేషన్ల ముట్టడి, రాస్తారోకోలు 2014 కు పూర్వం నిత్యకృత్యాలు అని కేటీఆర్ గుర్తు చేశారు. స్వరాష్ట్రంలో ముఖ్యమంత్రి కేసీఆర్‌ అంకుఠిత దీక్షతో కరెంట్‌ నిరంతరాయంగా వెలుగులు పంచుతోందని తెలిపారు.

KTR Tweet on Electricity Day :నేడు యావత్‌ భారతదేశంలో కరెంటు కోతలు లేని ఒకే ఒక రాష్ట్రం తెలంగాణ నిలిచిందని కేటీఆర్ తెలిపారు. మండు వేసవిలో సైతం అన్ని రంగాలకు 24 గంటల పాటు నాణ్యమైన విద్యుత్తును అందిస్తున్న ఏకైక రాష్ట్రం తెలంగాణ అని.. స్వతంత్ర భారత దేశంలో విద్యుత్తు రంగంలో ఏ రాష్ట్రం సాధించని విజయాలు కేసీఆర్ నాయకత్వంలోని తెలంగాణ ప్రభుత్వం సాధించిందని ట్విటర్ వేదికగా కేటీఆర్ వెల్లడించారు.

పెరిగిన విద్యుత్ సామర్థ్యం :రాష్ట్రం ఏర్పడే నాటికి ఉన్న స్థాపిత విద్యుత్‌ సామర్థ్యం కేవలం 7,778 మెగావాట్లు మాత్రమేనని... కేసీఆర్ ప్రభుత్వం చేసిన కృషి ఫలితంగా విద్యుత్‌ సామర్థ్యం 18,567 మెగావాట్లకు పెరిగిందని కేటీఆర్ వివరించారు. 2014-15లో తెలంగాణలో తలసరి విద్యుత్తు వినియోగం 1,356 యూనిట్లు మాత్రమే ఉండేదని చెప్పుకొచ్చారు. 2021-22 నాటికి అది 2,126 యూనిట్లకు పెరిగిందన్న కేటీఆర్... ఇదే సమయంలో జాతీయ సగటు 1,255 యూనిట్లుగా ఉందని వెల్లడించారు.

అన్ని రంగాలకూ గుండెకాయ లాంటిది హైదరాబాద్‌ :తెలంగాణ తలసరి విద్యుత్తువినియోగం, జాతీయ తలసరి వినియోగంకన్నా 69.40 శాతం ఎక్కువగా నమోదవడం మనందరికీ గర్వకారణమని కేటీఆర్ వ్యాఖ్యానించారు. ముఖ్యమంత్రి కేసీఆర్ ముందుచూపునకు నిదర్శనం హైదరాబాద్ నగరాన్ని పవర్ ఐలాండ్​గా మార్చడమని తెలిపారు. ఆర్థిక, పారిశ్రామిక, ఐటీ లాంటి అన్ని రంగాలకూ గుండెకాయ లాంటి హైదరాబాద్‌ను సీఎం కేసీఆర్‌ ‘పవర్‌ ఐలాండ్‌’గా మార్చారని పునరుద్ఘాటించారు.

దేశంలో ఇంకే నగరం కనీసం అలోచించని వినూత్న "పవర్ ఐలాండ్" హైదరాబాద్ నగరానికి ఏర్పాటు చేసినట్లు కేటీఆర్ వివరించారు. దీనివల్ల జాతీయ విద్యుత్ గ్రిడ్ విఫలమైనా నగరంలో కరెంటు సరఫరాకు విఘాతం కలగదని తెలిపారు. నగరం చుట్టూ 25 కిలోమీటర్లు, 80-100 కిలోమీటర్లు, 180-200 కిలోమీటర్ల పరిధిలో మూడు వలయాల్లో విద్యుత్ ఐలాండ్ నెలకొల్పారని... దేశంలోనే తొలి పవర్‌ ఐలాండ్‌ మెట్రో నగరంగా హైదరాబాద్‌ ప్రశంసలు అందుకొంటోందని కేటీఆర్ ట్వీట్ చేశారు.

ఇవీ చదవండి: