Kishan Reddy Fires on Congress Praja Palana : అభయహస్తం దరఖాస్తు ఫారాలు (Congress Abhaya Hastham) ప్రజలను అయోమానికి గురిచేస్తున్నాయని కేంద్ర మంత్రి, బీజేపీ రాష్ట్ర అధ్యక్షుడు కిషన్ రెడ్డి అన్నారు. ప్రజాపాలన అర్జీలు బయట అమ్ముతున్నారని ఆరోపించారు. ఇది ఆరు గ్యారంటీల అమలును ఆలస్యం చేసే ప్రక్రియ అని విమర్శించారు. రేషన్‌ కార్డు లేకుండా ఎలా పథకాలు ఇస్తారని ప్రశ్నించారు. హైదరాబాద్‌లో ఏర్పాటు చేసిన మీడియా సమావేశంలో పాల్గొన్న ఆయన మాట్లాడారు.
Praja Palana Program in Telangana : అభయ హస్తం దరఖాస్తు ఫారం వెనక ఉన్న మతలబు అర్థం కావట్లేదని కిషన్‌రెడ్డి పేర్కొన్నారు. రాజకీయ దృక్పథంతోనే అభయహస్తం ఫారం ఉందని, ప్రజలకు ఏమాత్రం లబ్ధి చేకూర్చేలా లేదని ఆరోపించారు. అర్జీలు అవసరం లేకుండా హామీలు నిలబెట్టుకునే అవకాశం ఉందని చెప్పారు. బీఆర్ఎస్ పదేళ్లుగా రేషన్‌ కార్డులు ఇవ్వలేదని, మరి రేషన్‌ కార్డు లేకుండానే జత చేయాలని కాంగ్రెస్‌ చెబుతోందని ఇది ఏ రకంగా సమంజమని ప్రశ్నించారు. పథకాల అమలు జాప్యం చేసేందుకే హస్తం పార్టీ అభయహస్తం నాటకమని కిషన్‌రెడ్డి ఆక్షేపించారు.
"అభయహస్తం దరఖాస్తు ఫారాలు ప్రజలను అయోమానికి గురిచేస్తున్నాయి. అభయహస్తం దరఖాస్తులు బయట అమ్ముతున్నారు. ఇది ఆరు గ్యారంటీల అమలు ఆలస్యం చేసే ప్రక్రియ. రేషన్‌ కార్డు లేకుండా ఎలా పథకాలు ఇస్తారు. రాజకీయ దృక్పథంతోనే అభయహస్తం ఫారం ఉంది. అభయహస్తం దరఖాస్తు ప్రజలకు ఏమాత్రం లబ్ధి చేకూర్చేలా లేదు." - కిషన్‌రెడ్డి, కేంద్రమంత్రి, బీజేపీ రాష్ట్ర అధ్యక్షుడు