కొవిడ్ వేళలో శబరిమల యాత్రకు ఈ నిబంధనలు తప్పనిసరి!

శబరిమల యాత్ర కోసం రానున్న భక్తులకు కొవిడ్​ దృష్ట్యా ప్రత్యేక నిబంధనలు రూపొందించినట్లు రాష్ట్ర ప్రభుత్వ సీఎస్​ సోమేష్​కుమార్​కు కేరళ సీఎస్ లేఖ రాశారు.

కరోనా వ్యాప్తి నేపథ్యంలో శబరిమల యాత్ర కోసం కేరళ ప్రభుత్వం ప్రత్యేక నిబంధనలు రూపొందించింది. భక్తుల ఆరోగ్యం, ఇతర అంశాలను దృష్ట్యా ఆలయ విధివిధానాలను రూపొందించారు. తెలంగాణ నుంచి పెద్ద సంఖ్యలో భక్తులు శబరిమల తరలివెళ్లనున్నందున రాష్ట్ర ప్రభుత్వ సీఎస్​ సోమేష్​కుమార్​కు కేరళ సీఎస్ లేఖ రాశారు.

లేఖలో పేర్కొన్న ముఖ్యాంశాలు:

• దర్శనం కోసం వర్చువల్​ క్యూపోర్టల్​ https://sabarimalaonline.org ద్వారా భక్తుల నమోదు తప్పనిసరి చేశారు.
• మొదటగా రోజుకు వెయ్యి, వారాంతంలో రోజుకు రెండు వేల మంది భక్తులను మాత్రమే ఆలయం లోనికి అనుమతించనున్నారు.
• శబరిమల ప్రవేశమార్గాల వద్ద యాంటీజెన్​ పరీక్షా కేంద్రాలను ఏర్పాటు చేయనున్నారు. దర్శనానికి 48 గంటల ముందు కొవిడ్​ నెగిటివ్​ నిర్ధరణ కలిగి ఉండాలి.
• పదేళ్లలోపు, 60 ఏళ్లకు పైబడిన వారికి దర్శనానికి అనుమతి లేదు.
• బీపీఎల్​, ఆయుష్మాన్​ భారత్​ కార్డులు ఉన్న వారు వెంట తీసుకెళ్లడం శ్రేయస్కరం.
• నెయ్యి అభిషేకం, పంపా నదిలో స్నానాలు, సన్నిధానం, పంపా, గణపతి కోవెలలో రాత్రి బసకు అనుమతి లేదు.
• ఎరుమేలి, వడసెర్రికర మార్గాల్లోనే శబరిమలకు వెళ్లేందుకు భక్తులకు అనుమతి ఉంటుందని తెలిపారు.