'అందరికి ఆమోదయోగ్యమైన సవరణలు చేయండి'

పౌరులందరూ సమానమని రాజ్యాంగం చెపుతోందని హైకోర్టు విశ్రాంత న్యాయమూర్తి జస్టిస్ చంద్రకుమార్ పేర్కొన్నారు. కేంద్ర ప్రభుత్వం మాత్రం ఓ వర్గ ప్రజల పట్ల వివక్ష చూపుతూ... పౌరసత్వ సవరణ, ఎన్ఆర్సీ బిల్లును రూపొందించిందని వ్యాఖ్యానించారు.

హైదరాబాద్ బషీర్ బాగ్ ప్రెస్​క్లబ్​లో యునైటెడ్ ఇండియా యాక్షన్ కమిటీ సమావేశాన్ని ఏర్పాటు చేసింది. ఈ కార్యక్రమంలో హైకోర్టు విశ్రాంత జడ్జి జస్టిస్ చంద్రకుమార్ పాల్గొన్నారు. దేశంలో రెండవ పౌరులుగా ఏ వర్గం ప్రజలను చూసినా... అది దేశ సమైక్యతకు, ప్రజల మధ్య ఐక్యతకు మంచిది కాదన్నారు. దేశంలో అన్ని మతాల వారు కలిసి మెలసి ఉంటున్నారని... ఏ మతం గొప్పదనే విభేదాలు రావడం ప్రజాస్వామ్యానికి మంచిది కాదని సూచించారు. మతాల మధ్య చిచ్చుపెట్టి విభజించి పాలించే కుట్రలో భాగమే సీఏఏ చట్టమని ఆయన దుయ్యబట్టారు. అందరికి ఆమోదయోగ్యమైన సవరణలు చేయాలని చంద్రకుమార్ కేంద్ర ప్రభుత్వాన్ని డిమాండ్ చేశారు.