ఎమ్మెల్సీ ఎన్నికల ఫలితాలు అనూహ్యం శాసనమండలి ఉపాధ్యాయ, పట్టభద్రుల నియోజకవర్గాల్లో అనూహ్య ఫలితాలు వచ్చాయి. శాసనమండలి చీఫ్ విప్ పాతూరి సుధాకర్ రెడ్డి, ఎమ్మెల్సీ పూల రవీందర్ ఓటమి పాలయ్యారు. ఆదిలాబాద్-కరీంనగర్-నిజామాబాద్-మెదక్ పట్టభద్రుల నియోజకవర్గంలో కాంగ్రెస్ అభ్యర్థి జీవన్ రెడ్డి విజయం సాధించారు. ఇవే జిల్లాలకు సంబంధించిన ఉపాధ్యాయ స్థానంలో పాతూరి సుధాకర్ రెడ్డిపై పీఆర్టీయూ టీఎస్ అభ్యర్థి కూర రఘోత్తంరెడ్డి గెలుపొందారు. వరంగల్-నల్గొండ-ఖమ్మం ఉపాధ్యాయ మండలి ఎన్నికల్లో సిట్టింగ్ ఎమ్మెల్సీ పీఆర్టీయూ అభ్యర్థి పూల రవీందర్పై యూటీఎఫ్ అభ్యర్థి అలుగుబెల్లి నర్సిరెడ్డి విజయభేరి మోగించారు. పార్టీలకు అతీతంగా జరుగుతున్నందున తెరాస ఎవరికి బీ ఫారాలను ఇవ్వలేదు. సుధాకర్ రెడ్డి, చంద్రశేఖర్ గౌడ్ స్వతంత్ర అభ్యర్థిగా, పూల రవీందర్ పీఆర్టీయూ తరఫున పోటీ చేశారు. వీరికి తెరాస మంత్రులు, ఎంపీలు, ఎమ్మెల్యేలు, మరికొందరు ప్రజాప్రతినిధులు పరోక్షంగా మద్దతు ఇచ్చారు.
జీవన్రెడ్డి కాంగ్రెస్ తరఫున పోటీ చేశారు. నర్సిరెడ్డికి వామపక్షాలు, హస్తం పార్టీ, పలు ఉపాధ్యాయ సంఘాలు మద్దతు తెలిపాయి. పలు ఉపాధ్యాయ సంఘాలు బలపర్చడం వల్ల పీఆర్టీయూ టీఎస్ అభ్యర్థి రఘోత్తంరెడ్డి విజయం సాధించారు.
ఇదీ చూడండి :బ్యాలెట్ పోలింగ్కు ఇందూరు సిద్ధం
