జనతా కర్ఫ్యూ: జనాలు లేక బోసిపోయిన భాగ్యనగరం

కరోనా వైరస్ ప్రబలకుండా నివారించేందుకు ప్రధాని మోదీ పిలుపునిచ్చిన జనతా కర్ఫ్యూను హైదరాబాద్​లో ప్రజలు స్వచ్ఛందంగా పాటించారు. స్వీయ నిర్బంధంలో ఉండి కరోనా వ్యాప్తి నివారణలో భాగస్వాములయ్యారు.

కరోనా వైరస్ వ్యాప్తి నివారించేందుకు కేంద్ర, రాష్ట్ర ప్రభుత్వాలు జనతా కర్ఫ్యూకు పిలుపునిచ్చిన నేపథ్యంలో హైదరాబాద్​ నగరం బోసిపోయింది. జనసంచారం లేక నగరంలోని రహదారులు నిర్మానుష్యంగా మారాయి. నిత్యం రద్దీగా ఉండే ప్రాంతాలు జనాలు లేక బోసిపోయాయి. దాదాపు 90 శాతం ప్రజలు స్వచ్ఛందంగా కర్ఫ్యూ పాటించారు.

నిత్యం వేలాది ప్రయాణికులతో కళకళలాడుతూ ఉండే కాచిగూడ, సికింద్రాబాద్​, నాంపల్లి, మలక్​పేట్ రైల్వే స్టేషన్లు జనాలు లేక వెలవెలబోయాయి. ఆదర్శ్​నగర్​లోని బిర్లామందిర్, బిర్లా సైన్స్ సెంటర్​ను గేట్లు మూసివేసి లోపలికి ఎవరిని అనుమతించ లేదు. ఎప్పుడూ రద్దీగా ఉండే చంపాపేట్, మదన్నపేట్ కూరగాయల మార్కెట్, మలక్ పేట్, మహబూబ్ పెన్షన్ మార్కెట్, మలక్​పేట్ ఏరియా హాస్పిటల్​ ఖాళీగా దర్శనమిస్తున్నాయి. దిల్​సుఖ్​నగర్, సంతోశ్​నగర్, సైదాబాద్, చాదర్​ఘాట్, కొత్తపేట, సనత్​నగర్, మైత్రివనం, ఎస్​ఆర్​నగర్, అమీర్​పేట, ఎర్రగడ్డ, పంజాగుట్ట ప్రాంతాలు నిర్మానుష్యంగా మారాయి.

జనతా కర్ఫ్యూకు మద్దతు ఇవ్వాలని ట్రాఫిక్ పోలీసులు వాహనాదారులను కోరారు. అబిడ్స్​లో కరోనా వైరస్ నివారణకు సహకరించాలని ఫ్లకార్డ్స్​తో అవగాహన కల్పించారు. నాంపల్లి, బషీర్ బాగ్, అబిడ్స్ తదితర ప్రాంతాల్లో దుకాణాలు స్వచ్ఛందంగా బంద్ చేశారు. వృద్ధులు, చిన్నారులు పూర్తిగా ఇళ్లకే పరిమితం కావాలని అధికారులు సూచిస్తున్నారు.

ఇదీ చూడండి: గుమ్మాలు, బాల్కనీల్లో నిల్చొని చప్పట్లు కొట్టండి-ప్రధాని