Inquiry Committee on Malakpet women death: హైదరాబాద్‌ మలక్పేట ప్రాంతీయ ఆసుపత్రిలో ఇటీవల జరిగిన ప్రసూతి మరణాలపై ప్రభుత్వం విచారణ కమిటీని నియమించింది. ఈ మేరకు తెలంగాణ వైద్య విధాన పరిషత్‌ (టీవీవీపీ) కమిషనర్‌ డాక్టర్‌ అజయ్‌కుమార్‌, గాంధీ ఆసుపత్రి సూపరింటెండెంట్‌ డాక్టర్‌ రాజారావు, పేట్లబురుజు ఆసుపత్రి సూపరింటెండెంట్‌ డాక్టర్‌ మాలతిలతో కూడిన త్రిసభ్య కమిటీ విచారణను చేపట్టింది.
వారం క్రితం ఇద్దరు గర్భిణులు కాన్పు కోసం మలక్పేట ప్రభుత్వ ఆసుపత్రిలో చేరగా సిజేరియన్‌ అనంతరం వారి ఆరోగ్య పరిస్థితి విషమించింది. దీంతో వారిని గాంధీ ఆసుపత్రిలో చేర్చారు. అక్కడ చికిత్స పొందుతున్న బాలింతలు మృతిచెందిన విషయం తెలిసిందే. దీనిపై టీవీవీపీ కమిషనర్‌ ఇప్పటికే అంతర్గత విచారణ చేపట్టారు. బాలింతల మృతికి బ్యాక్టీరియల్‌ ఇన్‌ఫెక్షనే కారణమని ప్రాథమికంగా నిర్ధారించినట్లు తెలిసింది. ఈ నివేదికను ప్రభుత్వానికి కూడా సమర్పించారు. అయితే ఫోరెన్సిక్‌ నివేదిక వస్తేనే కచ్చిత సమాచారం లభిస్తుందని వైద్యవర్గాలు తెలిపాయి.
ఈ ఘటనపై లోతుగా విచారించడానికి తాజాగా ఉన్నత స్థాయి బృందాన్ని నియమించిన ప్రభుత్వం వారం రోజుల్లో నివేదిక సమర్పించాలని ఆదేశించింది. మలక్పేట ఆసుపత్రిలోనే ప్రసవించిన మరో 18 మంది బాలింతలను ముందు జాగ్రత్తగా నిమ్స్‌లో చేర్పించి చికిత్స అందించారు. వీరిలో ఇద్దరికి కిడ్నీలకు ఇన్‌ఫెక్షన్‌ సోకడంతో డయాలసిస్‌ కూడా చేశారు. వీరిద్దరు మినహా అందరి ఆరోగ్యం కుదుటపడటంతో డిశ్ఛార్జి చేశారు. డయాలసిస్‌ పొందుతున్న ఇద్దరు కూడా కోలుకుంటున్నారని వైద్యవర్గాలు తెలిపాయి.